Në Prishtinë po vazhdon dita e dytë e konferencës ndërkombëtare “Partneritetet për ndryshim: Gratë që transformojnë sistemet, Avancimi i Parimeve të Prishtinës 2026–2035”.
Në këtë konferencë po merr pjesë edhe kryeministri i Kosovës, Albin Kurti. Kryeministri Kurti theksoi se gratë kanë qenë gjithmonë shtyllë e historisë së zhvillimit dhe qëndresës së vendit tonë.
“Sot, përgjegjësia jonë është që kontributi i tyre të shndërrohet gjithnjë e më shumë në mundësi pjesëmarrjeje dhe vendimmarrjeje. Barazia në të drejta dhe mundësi do të thotë që të drejtat e garantuara nga Kushtetuta dhe ligji të zbatohen në çdo gjykatë, në çdo komunë, në çdo vend pune, në çdo stacion policie dhe në çdo institucion. Do të thotë që dhuna ndaj grave dhe vajzave nuk tolerohet, nuk tolerohet dhe nuk fshihet, por parandalohet dhe ndëshkohet. Do të thotë që çdo vajzë dhe grua të ketë qasje të barabartë në arsim, punësim dhe mundësi për të ndërtuar të ardhmen e saj. Barazia në të drejta dhe mundësi do të thotë gjithashtu që gratë të mos jenë vetëm votuese që përfshihen, por qytetare që marrin pjesë, që bëhen vendimmarrëse”, theksoi ai.
Drejtoresha Ekzekutive e Fondacionit Jahjaga, Egzona Bexheti, theksoi se kjo konferencë shkon përtej diskutimeve tradicionale për barazinë gjinore.
“Sot do të flasim për rolin e grave në paqe dhe siguri, në diplomaci, ndërmjetësim, institucionet e sigurisë dhe vendimmarrje. Do të trajtojmë gjithashtu fuqizimin ekonomik, ndryshimet klimatike, si dhe mënyrën se si këto transformime po ndikojnë drejtpërdrejt në jetën e grave dhe të rinjve”, ka thënë ajo.
Ndërkaq, ish-presidentja e Kosovës, Atifete Jahjaga, tha se në vitin 2012, Parimet e Prishtinës artikuluan një vizion që sot duhet të jetë standard i qeverisjes demokratike, sepse pa pjesëmarrjen e plotë dhe lidershipin e grave nuk mund të ketë siguri gjithëpërfshirëse, drejtësi të plotë, zhvillim të qëndrueshëm dhe paqe afatgjatë.
“Pa pjesëmarrjen e plotë dhe lidershipin e grave nuk mund të ketë siguri gjithëpërfshirëse, drejtësi të plotë, zhvillim të qëndrueshëm dhe paqe afatgjatë”, theksoi Jahjaga./rtk
