Kryeministri në detyrë i Kosovës, Albin Kurti, ka bërë të ditur se Joe DioGuardi dhe Shirley Cloyes DioGuardi janë tashmë zyrtarisht shtetas të Republikës së Kosovës.
Kurti ka thënë se dyshja amerikane, të njohur për angazhimin e tyre të gjatë në mbështetje të Kosovës dhe shqiptarëve, tashmë i përkasin edhe zyrtarisht Republikës së Kosovës.
“Dy shtetas të rinj të Republikës, por miq të vjetër të Kosovës”, ka shkruar Kurti.
Ai ka treguar se ka zhvilluar një takim me Joe dhe Shirley DioGuardi në Zyrën e Kryeministrit, ku i ka falënderuar për kontributin e tyre ndër vite.
Sipas Kurtit, DioGuardit kanë dhënë kontribut të rëndësishëm për rreth katër dekada, nga puna në Kongresin e Shteteve të Bashkuara të Amerikës deri te angazhimi përmes Ligës Qytetare Shqiptaro-Amerikane.
Kurti ka vlerësuar veçanërisht rolin e Joe DioGuardit, si ish-kongresisti i parë amerikan me origjinë shqiptare, duke përmendur edhe mbështetjen e figurave amerikane si Tom Lantos, Bob Dole dhe Eliot Engel.
“Kosova ishte me fat dhe e bekuar që pati ambasadorë të këtillë edhe kur s’kishte ambasadë të Republikës në ShBA, andaj jemi përherë mirënjohës si shtet dhe popull”, ka shkruar Kurti.
Ai ka theksuar se Joe dhe Shirley DioGuardi vazhdojnë të jenë të interesuar për zhvillimet në Kosovë dhe të kontribuojnë me ide e angazhim për vendin.
