Kryeministri i Kosovës, Albin Kurti, ka deklaruar se pas ratifikimit të marrëveshjeve për Planin e Rritjes mes Kosovës dhe Komisionit Evropian, ka nisur transferimi i mjeteve financiare në vlerë prej 61.8 milionë euro si parafinancim në kuadër të këtij plani, përcjell KosovaPost.
Sipas tij, nga kjo shumë, rreth 29 milionë euro janë transferuar si kredi direkt në buxhetin e shtetit, ndërsa 33 milionë euro të tjera, prej të cilave 17.73 milionë euro në formë grantesh dhe 15.31 milionë euro si kredi, do të kalojnë përmes Kornizës së Investimeve për Ballkanin Perëndimor (WBIF).
Kurti theksoi se Kosova mbetet e fokusuar në zbatimin e Agjendës së Reformave dhe në shfrytëzimin e plotë të mundësive që ofron Plani i Rritjes, duke shtuar se Qeveria po ndërmerr të gjitha hapat e nevojshëm për përmbushjen e detyrimeve në kohë.
Ai gjithashtu tha se kjo është një agjendë e përbashkët që përfshin të gjitha institucionet e shtetit, përfshirë ekzekutivin, gjyqësorin dhe Kuvendin.
Kurti falënderoi Bashkimin Evropian për mbështetjen dhe theksoi angazhimin e Qeverisë për zbatimin e hapave të radhës.
