Kryeministri në detyrë i Republikës së Kosovës, Albin Kurti, ka zhvilluar një takim me nxënësit e Shkollës së Mesme të Lartë “7 Shtatori” në Prishtinë dhe të Gjimnazit “Vëllazërim Bashkim” në Ulqin, ku është diskutuar për rolin e arsimit në ndërlidhjen me tregun e punës, teknologjinë dhe proceset e digjitalizimit, transmeton KosovaPost.
Kurti, përmes një postimi, ka bërë të ditur se bashkëbisedimi me nxënësit është fokusuar edhe në rëndësinë e shkëmbimit të përvojave ndërmjet shkollave ku mësohet në gjuhën shqipe, përfshirë edhe ato përtej kufijve.
“Me nxënësit e Shkollës së Mesme të Lartë ‘7 Shtatori’ në Prishtinë dhe Gjimnazit ‘Vëllazërim Bashkim’ në Ulqin, bashkëbiseduam për arsimin e ndërlidhjen me tregun e punës, teknologjinë e digjitalizimin, dhe shkëmbimin e përvojave mes shkollave ku mësohet shqip edhe përtej kufinjve,” ka shkruar Kurti.
Ai ka theksuar se ky bashkëpunim ka ndikim të drejtpërdrejtë edhe në ndërtimin e lidhjeve mes të rinjve.
“Bashkëpunimi ndërmjet tyre kontribuon edhe në ndërtimin e urave mes të rinjve, e ku nxënësit edhe banojnë në familjet e njëri-tjetrit gjatë vizitave mes Prishtinës dhe Ulqinit,” ka theksuar Kurti.
