Ministrja e Industrisë, Ndërmarrësisë, Tregtisë dhe Inovacionit në Kosovë, Mimoza Kusari-Lila ka pritur në takim ministrin e Tregtisë së Turqisë, Omer Bolat, në Qeverinë e Kosovës, raporton Anadolu.
Palët vlerësuan lartë marrëdhëniet midis dy shteteve duke vënë theksin mbi shtimin e vëllimit të tregtisë Kosovë-Turqi.
Pas takimit, Bolat dhe Kusari-Lila morën pjesë në Takimin e Tryezës së Rrumbullakët të Biznesit Turqi-Kosovë, i organizuar në ndërtesën e qeverisë me pjesëmarrjen e biznesmenëve nga të dyja vendet.
– Kusari-Lila: Marrëdhëniet midis Kosovës dhe Turqisë janë të forta dhe të ndërtuara me besim të ndërsjellë
Ministrja e Industrisë, Sipërmarrjes, Tregtisë dhe Inovacionit Mimoza Kusari-Lila tha se marrëdhëniet midis Kosovës dhe Turqisë janë të forta dhe të ndërtuara me besim të ndërsjellë, megjithatë kjo marrëdhënie duhet të reflektohet edhe në një partneritet ekonomik më të balancuar dhe më dinamik.
Kusari-Lila tha se marrëdhëniet tregtare midis Kosovës dhe Turqisë kanë shënuar zhvillime pozitive dhe eksportet e Kosovës drejt Turqisë kanë pasur rritje por kanë nevojë për përmirësim. Lidhur me këtë, ajo tha se importet nga Turqia vazhdojnë të tejkalojnë eksportet e Kosovës dhe ministrja është e fokusuar që ta përmirësojë këtë strukturë duke bërë që Kosova të kalojë nga eksporti i produkteve të papërpunuara apo gjysmë të përpunuara, drejt produkteve me vlerë të shtuar si dhe shtimit të shërbimeve.
Sipas saj, rritja e tregtisë në shërbime veçanërisht në teknologji dhe informacion po tregon rezultate pozitive, gjë që tregon se Kosova ka potencial të rëndësishëm kapitalin njerëzor dhe sektorët inovativ.
“Prandaj, është e domosdoshme që bashkëpunimi ynë të zgjerohet përtej tregtisë së mallrave dhe të përfshijë edhe tregtinë në shërbime në përputhje me zhvillimet moderne ekonomike. Për të njëjtën, u dakorduam bashkë edhe me ministrin Bolat që marrëveshjes tonë të përbashkët të Tregtisë së Lirë të Mallrave, t’ja shtojmë edhe diskutimin, negociimin dhe miratimin e Marrëveshjes së Tregtisë së Lirë për Shërbimet”, tha Kusari-Lila.
Ajo theksoi se nga perspektiva e Qeverisë së Kosovës, prioritetet janë të qarta: modernizimi i kornizës tregtare, thellimi i bashkëpunimit institucional dhe tërheqja e investimeve strategjike, veçanërisht në prodhim, inovacion dhe sektorët tjerë me vlerë të shtuar.
– Bolat: Mes Turqisë dhe Kosovës ekzistojnë marrëdhënie të shkëlqyera politike dhe diplomatike
Në fjalën e tij, ministri Bolat tha se gjatë takimit me ministren Kusari-Lila kanë trajtuar shumë çështje dhe se janë pajtuar që marrëveshja e tregtisë së lirë ndërmjet dy vendeve po funksionon mirë.
Bolat theksoi se vëllimi i tregtisë ndërmjet Turqisë dhe Kosovës ka arritur në rreth 1 miliard dollarë në vit.
“Edhe në sektorin e shërbimeve, Kosova ka avantazh konkurrues. Për këtë arsye, vendosëm që takimi i JATCO-s, për të cilin ramë dakord duke nënshkruar një marrëveshje dy vite më parë, të mbahet deri në fund të këtij viti dhe aty do të diskutojmë zgjerimin e marrëveshjes së tregtisë së lirë duke përfshirë edhe sektorin e shërbimeve”, tha Bolat.
Bolat shtoi se shpreson që përmes nënshkrimit të një protokolli, të nisin negociatat zyrtare për zgjerimin e marrëveshjes së tregtisë së lirë.
Ai tërhoqi vëmendjen se në Kosovë ka shumë investime turke në fushat e shërbimeve financiare, sistemeve bankare, shpërndarjes së energjisë, operimit të aeroportit si dhe në disa investime prodhuese të vogla dhe të mesme.
“Si palë turke, do të kontribuojmë në programin e ri të qeverisë së Kosovës për krijimin e zonave të organizuara industriale ose teknoparqeve dhe njëkohësisht për operimin e një zone të tregtisë së lirë”, tha ai.
Bolat theksoi se janë të gatshëm të ndajnë me Kosovën ekspertizën dhe përvojën e tyre në këtë fushë, duke nënvizuar se do të shërbejnë si urë ndërmjet dy ministrive për bashkëpunim në krijimin e zonave industriale të organizuara në Kosovë.
Ai deklaroi se kontraktorët turq janë të njohur në mbarë botën për aktivitetet e tyre të suksesshme në rreth 140 vende, me një portofol projektesh prej rreth 560 miliardë dollarësh gjatë 50 viteve të fundit, duke shtuar:
“Nën udhëheqjen e presidentit tonë Erdogan, në 23 vjetët e fundit kjo shifër në projektet e kontraktimit në mbarë botën ka arritur në 510 miliardë dollarë. Në Kosovë ata janë aktivë në shumë projekte rrugësh, tunelesh, urash dhe infrastrukture. Kosova do të jetë mikpritëse e Lojërave Mesdhetare në vitin 2030. Gjithashtu, në kuadër të Planit të Rritjes së Bashkimit Evropian për Ballkanin Perëndimor, ekzistojnë shumë projekte që do të realizohen me fondet e ndara nga BE-ja. Prandaj, kompanitë tona janë të gatshme të mbështesin të gjitha këto projekte me njohuritë dhe ekspertizën e tyre. Këtë ua kemi shprehur edhe bashkëbiseduesve tanë”, theksoi ai.
Bolat shtoi se mes Turqisë dhe Kosovës ekzistojnë marrëdhënie të shkëlqyera politike dhe diplomatike, duke nënvizuar se Turqia ishte ndër vendet e para që e njohu pavarësinë e Kosovës në vitin 2008 si dhe udhëhoqi përpjekjet që shumë vende tjera ta njohin pavarësinë e Kosovës.
“Turqia ka qenë pararendëse që shumë vende islame, qeveri dhe republika turke të Azisë Qendrore ta njohin Republikën e Kosovës. Së fundi, me iniciativat e presidentit tonë pranë qeverisë së Sirisë, edhe Siria e ka njohur Kosovën. Shpresojmë që kjo prirje të vazhdojë. Ekonomia e fortë e Turqisë, stabiliteti politik dhe lidershipi i fuqishëm nën udhëheqjen e presidentit tonë ofrojnë një mjedis shumë të qëndrueshëm për rajonin e Ballkanit. Ministria jonë e Jashtme dhe stafi diplomatik po punojnë shumë që periudha paqësore dhe e qëndrueshme në Ballkan të vazhdojë përgjithmonë”, shtoi ai.
Marrëveshja e Tregtisë së Lirë midis Kosovës dhe Turqisë, hyri në fuqi në vitin 2019.
