Liga Qytetare Shqiptare Amerikane e drejtuar nga Joseph Dioguardi i është drejtuar me një peticion Bordit të AADF lidhur me parkun kombëtar të Butrintit.
Në këtë peticion theksohet se nga ana e Fondacionit ka veprime të dyshimta, që të lënë të kuptohet se qëllimi është marrja në dorë e trashëgimisë kulturore që është Butrinti.
Mes të tjerash bëhet thirrje që të qëndrohet sa më larg pasurive publike shqiptare.
“Ne jemi të shqetësuar për veprimet shumë të dyshimta të AADF-së në Butrint dhe në vende të tjera të trashëgimisë kulturore në Shqipëri, sikurse janë publikuar nga UNESCO-ja dhe Zëri i Amerikës.
Ne kemi dijeni se AADF-ja ka shpenzuar më shumë 300,000 $ për të paguar dy plane të menaxhimit të integruar për Butrintin, ku i dyti “ka akomoduar” qëllimin e saj për të shtënë në dorë Butrintin.
Ne kemi dijeni se AADF-ja ka shpenzuar më shumë se 50,000$ për të paguar dhe për të lobuar për ligjin shqiptar të trashëgiminë kulturore, që i mundëson asaj të shtjerë në dorë Butrintin përmes një fondacioni të dedikuar, të cilin ajo e kontrollon.
Ne besojmë se në dy vitet e fundit AADF-ja ka paguar dhjetra mijra dollarë të tatimpaguesve amerikanë për tarifa avokatore dhe ekspertësh për mbrojtjen para Gjykatës Kushtetuese të Shqipërisë të skemës së vet të paligjshme për të shtënë në dorë Butrintin.
Ne besojmë se në dy vitet e fundit AADF-ja ka harxhuar dhjetra mijra dollarë të tatimpaguesve amerikanë për të financuar buxhetin dhe pagat e të ashtuquajturit “Fondacion për Menaxhimin e Butrintit””, thuhet në peticion.
