Lidhja Demokratike e Kosovës është deklaruar sërish kundër një marrëveshje për normalizim të raporteve me Serbinë, që s’e ka njohjen brenda.
Kryetari i LDK’së, Lumir Abdixhiku, ka thënë se Kosovës i duhet një marrëveshje me njohje të ndërsjellë, dhe se nëse devijohet nga ky qëllim atëherë Qeveria do të jetë përgjegjëse.
“Në vlerësimin tonë, të anëtarësisë sonë, Kosovës nuk i duhet një marrëveshje bazë që nuk e përmban njohjen. Vendit tonë i duhet një marrëveshje përfundimtare që në thelb ka njohjen e ndërsjellë ndërmjet dy vendeve – si shtete të pavarura e sovrane. Çdo devijim nga ky orientim strategjik është papërgjegjësi e pariparueshme e Qeverisë aktuale”, njoftoi Abdixhiku në Facebook.
Ky qëndrim u ripërsërit gjatë mbledhjes së Kryesisë së LDK’së dhe ajo me kryetarët e degëve, ku u rikonfirmua qasja e LDK’së për dialogun.
Abdixhiku po ashtu ka theksuar se koordinimi me aleatët është jetik për Kosovën.
“Në këtë proces, koordinimi i ngushtë me aleatë mbetet jetik për të ardhmen euroatlantike të vendit tonë.”
Njoftimi i plotë:
Sot, mbajtëm mbledhjen e Kryesisë së Lidhjes Demokratike të Kosovës, si dhe mbledhjen me kryetarët e Degëve. Në të dy takimet, me unanimitet të plotë, u rikonfirmua qëndrimi i LDK-së mbi procesin e dialogut.
Në vlerësimin tonë, të anëtarësisë sonë, Kosovës nuk i duhet një marrëveshje bazë që nuk e përmban njohjen. Vendit tonë i duhet një marrëveshje përfundimtare që në thelb ka njohjen e ndërsjellë ndërmjet dy vendeve – si shtete të pavarura e sovrane. Çdo devijim nga ky orientim strategjik është papërgjegjësi e pariparueshme e Qeverisë aktuale.
Në këtë proces, koordinimi i ngushtë me aleatë mbetet jetik për të ardhmen euroatlantike të vendit tonë.
