Unanimisht, me asnjë abstenim dhe asnjë kundër, Lumir Abdixhiku mori besimin e Lidhjes Demokratike të Kosovës në zgjedhjet parlamentare të 28 dhjetorit, për të qenë i pari në listë.
Këshilli i Përgjithshëm i LDK-së nuk pati të nominuar tjetër për ta bërë kandidaturën kontest brendapartiak.
Lidhja Demokratike e Kosovës garon në emër ndërsa për koalicion si parti të brendashkrirë në listën e vet, ka marrë Partinë për Drejtësi të Ferid Aganit.
Abdixhiku, në adresimin e tij para Këshillit të Përgjithshëm të partisë, deklaroi se LDK është e përgatitur të marrë përgjegjësinë e qeverisjes dhe të rikthejë stabilitetin institucional në vend.
“LDK është gati të marr timonin, gati të jap qeverisje të dinjitetshme, gati të zhbëjë dëmet e bëra, gati të sjellë standard evropian të punës dhe politikës, si dhe gati të rikthej Kosovën në rrugën e saj origjinale Euroatlantike. Po ashtu gati të rifitoj besimin e qytetarëve dhe respektin e aleatëve”, theksoi Abdixhiku.
