Sot në ditën shumë domethënëse për shqiptarët, në Ditën e shënuar të Pavarësisë së Kosovës, u nënshkrua Deklarata për Bashkimin Opozitar Shqiptar në Maqedoni të Veriut, përbrenda koalicionit VLEN, duke bërë një hap të rëndësishëm drejt një uniteti me parime të partive politike në Maqedoninë e Veriut.
Nënshkrimet e kësaj deklarate u bënë nga lideri i Aleancës për Shqiptarët (ASH), Arben Taravari, Bekim Qoku nga Lëvizja Vetëvendosje, Bilall Kasami i Lëvizjes Besa, Izet Mexhiti nga Lëvizja Demokratike dhe Afrim Gashi nga Alternativa.
Në deklaratë theksohet se ky bashkimi po hedh themelet e një epoke të re mes partive shqiptare në vend, duke shfaqur një unitet të përbashkët për të përballuar sfidat dhe për të ndërtuar një vizion të përbashkët për të ardhmen e shqipëtarëve në vend.
Gjithashtu, u bë e ditur se kandidati i katër partive për zgjedhjet presidenciale do të jetë Arben Taravari, duke e bërë këtë deklaratë edhe një hap më shumë drejt bashkimit të opozitës në Maqedoninë e Veriut dhe ndryshimeve politike në të ardhmen e afërt.
