Një plan rindërtimi prej 53 miliardë dollarësh që rivalizon idenë e Presidentit Donald Trump që SHBA të “marrë Gazën” dhe të largojë më shumë se dy milionë palestinezë, është miratuar nga liderët arabë në një samit urgjent në kryeqytetin egjiptian Kajro.
“Plani i Egjiptit është tani një plan arab”, deklaroi sekretari i përgjithshëm i Ligës Arabe Ahmed Aboul Gheit në fund të takimit disa orëshe.
Pa iu referuar konkretisht ideve të Presidentit Trump, ai nënvizoi se “qëndrimi arab është të refuzojë çdo zhvendosje, qoftë ajo vullnetare apo e detyruar”.
Egjipti kishte prodhuar një plan të detajuar, me një dokument prej 91 faqesh, duke përfshirë imazhe të lagjeve me gjethe dhe ndërtesave të mëdha publike, për të kundërshtuar një skemë të SHBA-së të etiketuar si “Riviera e Lindjes së Mesme” që tronditi botën arabe dhe më gjerë.
Në fjalën e tij, presidenti i Egjiptit, Abdul Fattah al-Sisi bëri thirrje gjithashtu për një plan paralel krahas rindërtimit fizik për të ecur drejt asaj që njihet si zgjidhja e dy shteteve. Kjo shihet gjerësisht nga shtetet arabe dhe shumë të tjera, si e vetmja zgjidhje e qëndrueshme për këtë konflikt të përhershëm, por është përjashtuar me vendosmëri nga kryeministri izraelit Benjamin Netanyahu dhe aleatët e tij, shkruan A2CNN.Ky plan i ri propozon që Gaza të drejtohet, përkohësisht, nga një “komitet menaxhimi nën ombrellën e qeverisë palestineze” i përbërë nga teknokratë të kualifikuar, por pa një rol specifik për Hamas.
