Aktivisti nga ORCA, Rron Gjinovci është liruar nga Policia e Kosovës, pas arrestimit orë më parë – në protestën para Rektoratit të Universitetit të Prishtinës.
Lajmin e ka bërë të ditur Gjinovci në një postim në Facebook, ku ka thënë se nuk ka asgjë për të thënë, pasi sipas tij kanë folë studentet dhe aktivistet.
“Të dashtun, jom liru, jom tu shku në zyre. Unë s’kom kurgjo me thanë, kanë folë studentet dhe aktivistet boll, ndëgjojini ato. Është koha me i ndëgju storjet e studenteve dhe kërkesat e aktivisteve që po e organizojnë protestën, e na tjert me u solidarizu me to”, ka shkruar ai.
Në protestën e studentëve para Rektoratit të Universitetit të Prishtinës, policia ka shpërndarë me forcë aktivistët e Lëvizjes Feministe Studentore dhe aktivistë të tjerë të cilët janë duke protestuar që nga mëngjesi para Rektoratit për shkarkimin e profesorit Xhavat Krasniqi i cili dyshohet për ngacmime seksuale ndaj studentëve.
Gjinovci është arrestuar në këtë protestë nga Policia gjatë përleshjes me protestuesit.