Kancelari i Gjermanisë, Friedrich Merz, e ka uruar Albin Kurtin për rizgjedhjen në postin e kryeministrit të Kosovës dhe formimin e Qeverisë së re.
Në një letër urimi drejtuar Kurtit, Merz ka thënë se Kosova tashmë ka lënë pas një periudhë disa mujore të pasigurisë politike, e cila, sipas tij, i ka imponuar vendit kosto të larta.
“Ju përgëzoj përzemërsisht për rizgjedhjen Tuaj Kryeministër i Republikës së Kosovës. Kosova ka lënë pas muaj të tërë të pasigurisë politike, e cila i ka imponuar vendit kosto të larta”, ka shkruar Merz.
Ai ka vlerësuar se konfirmimi i Kurtit në krye të Qeverisë krijon mundësi për tejkalimin e ndarjeve politike dhe zgjidhjen e çështjeve të mbetura institucionale.
“Konfirmimi i zgjedhjes tuaj ofron mundësinë e ndërtimit të urave përtej prizmit partiak, zgjidhjes së çështjeve të hapura institucionale dhe avancimit të reformave”, thuhet në letrën e kancelarit gjerman.
Merz ka theksuar gjithashtu se për Gjermaninë mbetet thelbësor përparimi në dialogun e ndërmjetësuar nga Bashkimi Evropian për normalizimin e marrëdhënieve ndërmjet Kosovës dhe Serbisë.
Në fund të letrës, kancelari gjerman ka ritheksuar mbështetjen e Gjermanisë për Kosovën, duke e cilësuar raportin me popullin e Kosovës si një miqësi të veçantë.
“Gjermania qëndron fuqishëm në krah të Kosovës. Ne ndajmë një miqësi të veçantë me popullin e Kosovës”, ka shkruar Merz. (bundesregierung.de)
