Një gjykatë në shtetin amerikan të New Mexico ka urdhëruar kompaninë Meta Platforms, pronare e Facebook dhe Instagram, të paguajë gjithsej 942 milionë dollarë, pasi një juri konstatoi se kompania nuk ka arritur të mbrojë përdoruesit e mitur nga rreziqet e mediave sociale.
Sipas vendimit, Meta duhet të krijojë një fond prej 567 milionë dollarësh për masa korrigjuese, përveç 375 milionë dollarëve gjoba civile të vendosura më herët.
Gjykata urdhëroi gjithashtu kompaninë të zbatojë masa të reja mbrojtëse për të miturit, përfshirë fshehjen automatike të numrit të “pëlqimeve” në përmbajtjet e publikuara nga përdoruesit e mitur.
Vendimi parashikon edhe kufizime për kohën që të rinjtë mund të kalojnë në Facebook dhe Instagram në New Mexico, si dhe prezantimin e materialeve informuese për rreziqet që lidhen me përdorimin e platformave.
Gjykatësi e cilësoi Metën si një “shqetësim të vërtetë publik”, duke e krahasuar ndikimin e saj me ndotjen e ajrit dhe duke theksuar nevojën për masa më të forta për mbrojtjen e fëmijëve.
Ky konsiderohet një nga vendimet më të mëdha financiare të marra ndonjëherë kundër Metës në lidhje me sigurinë e fëmijëve dhe të rinjve. Kompania pritet të përballet edhe me procese të tjera gjyqësore gjatë javëve në vijim.
