Ministria e Financave ka njoftuar se ka pranuar nga Prokuroria njoftimin për hedhjen poshtë të kallëzimit penal të bërë nga zyrtarë të Komunës së Prishtinës lidhur me pretendimet për bllokimin e buxhetit të komunës.
Sipas Ministrisë së Financave, vendimi i Prokurorisë tregon se pretendimet e zyrtarëve të Komunës së Prishtinës për bllokim të buxhetit nga Ministria kanë qenë të pabazuara.
Ministria ka deklaruar gjithashtu se stafi i saj ka vepruar në përputhje me dispozitat ligjore.
Në njoftimin e saj, MF-ja ka rikujtuar se Komuna e Prishtinës kishte dorëzuar me vonesë buxhetin për vitin 2025, disa muaj pas afatit të përcaktuar me ligj dhe pasi Kuvendi kishte miratuar Ligjin e Buxhetit.
Sipas Ministrisë, kjo vonesë kishte bërë që buxheti i Komunës së Prishtinës të mos përfshihej në Ligjin e Buxhetit, duke pamundësuar alokimin dhe shfrytëzimin e plotë të mjeteve buxhetore.
Për këtë çështje, udhëheqësia e Komunës së Prishtinës kishte akuzuar zyrtarë të Ministrisë së Financave për bllokim të qëllimshëm të buxhetit dhe kishte dorëzuar kallëzim penal.
Ministria e Financave ka thënë se mirëpret përfundimin e çështjes.
“Ministria e Financave mirëpret epilogun e kësaj çështjeje që vërteton se akuzat ndaj stafit të Ministrisë ishin të pabaza, dhe njëkohësisht rikonfirmon përkushtimin që të vazhdojë punën profesionale”, thuhet në fund të njoftimit./teve1.info/
