Ministria e Punëve të Jashtme dhe Diasporës (MPJD) ka falënderuar bashkatdhetarët për pjesëmarrjen në procesin e votimit pranë përfaqësive diplomatike dhe konsullore të Republikës së Kosovës, përcjell KosovaPost.
Përmes një njoftimi, MPJD bëri të ditur se votimi është zhvilluar në mënyrë të rregullt dhe në përputhje me procedurat ligjore, duke reflektuar përkushtimin e qytetarëve ndaj proceseve demokratike të vendit.
Ministria shprehu mirënjohje edhe për misionet diplomatike dhe konsullore të Kosovës për angazhimin profesional gjatë organizimit të procesit, si dhe për Komisionin Qendror të Zgjedhjeve për bashkëpunimin e ngushtë.
MPJD vlerësoi gjithashtu kontributin e qytetarëve të Kosovës që jetojnë jashtë vendit, duke theksuar se pjesëmarrja e tyre dëshmon lidhjen e fortë me atdheun dhe rolin aktiv në jetën demokratike të vendit.
Sipas ministrisë, procesi i votimit në përfaqësitë diplomatike dhe konsullore u zhvillua pa probleme dhe me respektim të plotë të rregullave zgjedhore.
