Asociacioni i Komunave me Shumice serbe, në sytë e ministres së Punëve të Jashtme të Kosovës, Donika Gërvalla ka vdekur, kjo pasi që sipas saj Gjykata Kushtetuese e Kosovës ka konstatuar se 23 nenet e kësaj marrëveshjeje nuk janë në përputhje me Kushtetutën e Kosovës.
“Beogradi vërtet flet për Asociacionin, por ky propozim ka vdekur dhe nuk mund të ringjallet. Gjykata Kushtetuese vendosi që Asociacioni të mos ndodhte. Nuk është e mundur të gjesh një qeveri në një botë demokratike që është e gatshme të zbatojë diçka që shkel kushtetutën e saj”, ka thënë Gërvalla në një intervistë për mediumin estonez, ERR.
Për Gërvallën Asociacioni një-etnik, të cilën e kërkon Serbi, është një zgjidhje e shekullit 19-të.
Megjithatë ajo shton se Kosova është e gatshme të diskutojë për të drejtat e pakicave në rast se edhe Beogradi zyrtar pajtohet në të njëjtën mënyrë të diskutojë për pakicën shqiptare në Serbi.
“Për ne nuk është problem t’u japim serbëve të njëjtat të drejta siç u jep Serbia minoriteteve të saj. Ne aktualisht garantojmë të drejta më të mëdha për pakicat se kushdo tjetër në rajon”, ka shtuar ajo
Duke folur për kërkesën e Serbisë për një Asociacion i cili ka kompetenca ekzekutive, kryediplomatja kosovare ka dhënë si shembull Bosnje e Hercegovinën, e cila sipas saj është shndërruar në një shtet jo-funksional për shkak se entiteti serb në Bosnje ka fituar një pushtet të tillë ekzekutiv brenda Bosnjës.
“Ne nuk do të bëjmë diçka të tillë në Kosovë. Të drejtat e pakicave janë të rëndësishme, ne jemi një vend multietnik, por dhënia e të drejtave të tilla që paralizojnë vendin tonë dhe e bëjnë atë jofunksional, nuk do të ndodhë”.
