Inspektorati Qendror i Mbikëqyrjes së Tregut (IQMT) ka paralajmëruar bizneset prodhuese, marketet dhe subjektet e tjera që tregtojnë produkte të qumështit që të tërheqin menjëherë nga tregu produktet e konstatuara si të papërputhshme.
Sipas njoftimit të Ministrisë së Industrisë, Ndërmarrësisë, Tregtisë dhe Inovacionit (MINTI), bëhet fjalë për produktet e identifikuara si të papërputhshme në raportet zyrtare të Agjencisë së Ushqimit dhe Veterinarisë (AUV), me numër 4942, të datës 27 korrik 2026, dhe 5203, të datës 10 gusht 2026.
IQMT ka bërë të ditur se nga sot do të intensifikojë kontrollet në të gjitha subjektet që tregtojnë produkte të qumështit.
“Çdo biznes në të cilin gjatë inspektimit do të konstatohet prania e produkteve të qumështit me mospërputhje, të cilat nuk janë tërhequr nga tregu sipas kërkesave të inspektorit, do t’i nënshtrohet masave ndëshkuese”, thuhet në njoftim.
Sipas Ligjit për Inspektoratin Qendror të Mbikëqyrjes së Tregut, personat juridikë që nuk eliminojnë parregullsitë e konstatuara ose nuk veprojnë sipas kërkesave të inspektorit mund të gjobiten nga 3 mijë deri në 9 mijë euro.
IQMT ka theksuar se mos tërheqja nga tregu e produkteve të konstatuara si të papërputhshme, përfshirë ato me përmbajtje të padeklaruar, përbën shkelje të kërkesave ligjore dhe cenon të drejtat dhe interesat e konsumatorëve.
Ministria ka bërë të ditur se përmes IQMT-së do të intensifikojë kontrollet në treg, me qëllim të mbrojtjes së konsumatorëve dhe garantimit të respektimit të kërkesave ligjore.
IQMT u ka bërë thirrje bizneseve që të veprojnë menjëherë dhe të tërheqin nga tregu produktet e identifikuara si të papërputhshme.
