Presidenti i SHBA-së, Donald Trump, tha se Washingtoni po e ndalon në mënyrë aktive Izraelin nga kryerja e sulmeve të tjera ndaj Libanit, ndërsa një armëpushim i ri ka hyrë në fuqi, transmeton Anadolu.
“Izraeli nuk do ta bombardojë më Libanin. Ata janë të ndaluar ta bëjnë këtë nga SHBA-ja. Mjaft më!!”, shkroi Trump në platformën e tij Truth Social.
Ai gjithashtu theksoi se armëpushimi mes Libanit dhe Izraelit është plotësisht i ndarë nga bisedimet në vazhdim me Iranin. Trump tha se Washingtoni do të vazhdojë të “punojë me Libanin dhe të trajtojë situatën me (Hezbollahun) në mënyrë të përshtatshme”.
Trump iu referua Hezbollahut libanez, çarmatosjen e të cilit SHBA-ja dhe Izraeli e kanë kërkuar prej kohësh.
Trump njoftoi të enjten një armëpushim dhjetëditor në Liban, që filloi në mesnatë sipas kohës lokale në Tel Aviv dhe Bejrut.
Më shumë se 2.196 persona janë vrarë dhe 7.185 janë plagosur gjatë 45 ditëve të sulmeve izraelite ndaj Libanit, ndërsa mbi 1 milion njerëz janë zhvendosur, sipas shifrave zyrtare.
Izraeli nisi luftë kundër Libanit në tetor 2023 dhe një armëpushim u shpall në nëntor të vitit pasues, por Izraeli vazhdoi ta shkelte atë çdo ditë përpara se të zgjeronte ofensivën e tij më 2 mars.
Izraeli mban të pushtuara zona në jug të Libanit, disa prej dekadash dhe të tjera që nga nisja e ofensivës së re tokësore ndaj Libanit këtë vit.
