Vrasjet, tentimet për vrasje, dhuna në familje e vepra të tjera të natyrës penale u bënë shkak që 36 të pandehur të sillen në Institutin e Psikiatrisë Forenzike, për të marrë trajtimin.
Institucionet e Drejtësisë vazhdimisht bëjnë kërkesa për akomodimin e të pandehurve të tjerë në këtë Institut. Por, kjo nuk mund të ndodhë. Instituti i Psikiatrisë Forenzike ka vetëm 36 shtretër në dispozicion.
“Në Institutin e Psikiatrisë Forenzike i kemi 36 shtrtër dhe i kemi 36 pacientë. Prej vitit 2019 as edhe një ditë nuk ka kaluar që ne nuk kemi punuar me kapacitete të plota. Kjo ndodh për shkak se kërkesat e prokurorive dhe gjykatave janë të larta dhe numri i shtretërve që ne e ofrojmë është i vogël”, tha Shpend Haxhibeqiri, drejtor i Institutit të Psikiatrisë Forenzike.
Drejtori i këtij institucioni, Shpend Haxhibeqiri, thotë s’kanë bërë kërkesa për rritje të kapaciteteve, megjithatë rezultatet po mungojnë.
“Kërkesa për rritjen e kapaciteteve tona është theksuar vite me rradhë. Ne nuk kemi repart të ndarë për femra dhe të mitur duke ditur që numri i rasteve është gjithmonë në rritje. Pra neve minimum na duhet shtimi i dy reparteve si dhe rritja e kapaciteteve në repartet për ndalim dhe në atë për paraburgim”, tha Haxhibeqiri.
Avokati Hilmi Jashari thotë se në mungesë të kapaciteteve, të akuzuarit dërgohen në paraburgim, që rrjedhimisht përbën edhe shkelje të të drejtave të njeriut.
“Ata persona vendosen në paraburgim, që është në kundërshtim të plotë edhe me konventat ndërkombëtare dhe kjo përbënë shkelje të drejtave të njeriut domethënë të drejtat më elementare të njeriut shkelen. Konvetat Evropiane e konsiderojnë shtetin përgjegjës”, tha Hilmi Jashari, avokat.
Sipas Jasharit, ekziston mundësia që pas lirimit nga paraburgimi, të pandehurit ta përsërisin veprën.
“Po mundësi të mëdha janë që ata të bëhen recidivist të veprës. Nuk mundë të themi me siguri të plotë qe ata e përsërisin veprën mirëpo gjasat e mëdha janë që kjo të ndodhë”, tha Jashari.
Ndërkaq, në Institutin e Psikiatrisë Forenzike trajtohen persona që kanë kryer vepra penale që kanë çrregullime mendore e edhe të tillë që kanë probleme me substancat psikopative. Lidhur me këtë shqetësim, ATV-ja ka tentuar të bisedojë me Ministrinë e Shëndetësisë, mirëpo ky institucion nuk ka kthyer përgjigje. /atvlive.tv