Prokuroria Themelore në Prishtinë ka njoftuar se me urdhër të Prokurorit të Shtetit janë ndaluar dy persona të dyshuar për keqpërdorim të detyrës zyrtare, transmeton KosovaPost.
Sipas njoftimit, të dyshuarit me iniciale D.H. dhe I.I. janë zyrtarë në Gjykatën Themelore në Prishtinë.
“ Prokuroria Themelore në Prishtinë, njofton opinionin publik se Departamenti për Krime të Rënda-Njësiti për Krime Ekonomike dhe Korrupsion me urdhër të Prokurorit të Shtetit ka ndaluar personat me inicialet D.H. dhe I.I., zyrtarë në Gjykatën Themelore në Prishtinë, për shkak se të njëjtit dyshohen se kanë keqpërdorur detyrat zyrtare, më konkretisht dyshohen se kanë kryer veprën penale “Keqpërdorimi i pozitës apo autoritetit zyrtar”, nga neni 414 i KPRK-së.”, thuhet në njoftimin e prokurorisë.
Në Komunikatën për media thuhet se Prokuroria ndaj të dyshuarve do t’i ndërmerrë veprimet e mëtejme ligjore, ndërsa ndaj kësaj çështjeje penale do të vazhdojnë të zhvillohen hetime në koordinim me Policinë e Kosovës.
