Shkruan: Elvis Hoxha
Ndërkombëtarët kërkojnë ende që me urdhër të peshkut të shmanget deeskalimi në veri të Kosovës. Në fakt deeskalimi i vërtetë është në Beograd. Por duke përmendur Veriun e Kosovës, ndërkombëtarët po heshtin publikisht protestën ndaj Vuçiçit. Pra ata po shpresojnë ende se mund të përdorin si bashkëpunëtor të moderuar nxënësin Sheshelit dhe ministrin e Millosheviçit.
Ndërkombëtarët nuk po e thonë kurrë se qeveria e Kosovës fton komunitetin e komunave në veri të nënshkruajnë një peticion për zgjedhje. Pra ata po heshtin publikisht edhe përpjekjet e qeverisë së Kosovës.
Por ajo çka është më e rëndë, është fakti se ShBa po sanksionon persona në Serbi. Duke sanksionuar Vulinin, ata shpëtojnë përkohësisht Vuçiçin. A thua se Vulini punon për vete e jo për Serbinë. A thua se pozicioni i Vulinit është i ulët në administratën serbe.
Nuk ka asnjë vlerë të ndëshkosh me sanksione Vulinin dhe Dodikun, pa ndëshkuar Serbinë dhe republikën serbe në BH. Kjo do të thotë se në Serbi faji është i personalizuar, dhe jo sistemik dhe me themele te gjenocidi.
Nuk ke si ta zbardhësh të zezën e Serbisë së Vuçiçit.
Këto rrekje pa rezultat nuk po i bën Evropa e deputetëve dhe eurodeputetëve, por ajo e negociatorëve dhe e burokratëve. E keqja këtyre të fundit do t’u vijë nga partneri i tyre i moderuar Vuçiç, ngjashëm me formën me të cilën ai kërcënoi kryetaren e komisionit për marrëdhënie me jashtë të parlamentit britanik. Vuçiçi do të hedhë vallen e destabilizimin për aq kohë sa të ndjekin negociatorët evropianë strategjinë e strucit.
Nuk do të shkojë shumë kohë dhe struci i negociatorëve evropianë do të detyrohet ta nxjerrë kokën e të mendojë masat që do të duhet të marrë kundër Serbisë së Vuçiçit. Sa më shpejt, aq më mirë. Jo thjesht për Kosovën, por për vetë Evropën.
