Nëntë persona kanë humbur jetën si pasojë e sulmeve me raketa balistike ruse në Kiev, kanë njoftuar zyrtarët vendas. Sipas Shërbimit Shtetëror të Emergjencave të Ukrainës, edhe 28 persona të tjerë janë plagosur nga sulmi që goditi kryeqytetin ukrainas të shtunën në mëngjes.
Së fundmi, Moska ka intensifikuar sulmet vdekjeprurëse ndaj Kievit, duke shtuar presionin mbi mbrojtjen ajrore të Ukrainës. Presidenti ukrainas, Volodymyr Zelensky, ka theksuar nevojën urgjente për sisteme moderne të përgjimit të raketave.
Sulmet ndodhën vetëm dy ditë pasi një raketë lundruese ruse ra në territorin e Polonisë gjatë një sulmi të gjerë ndaj Ukrainës, ku mbetën të vrarë të paktën tetë persona, përfshirë gjashtë anëtarë të një familjeje.
Ndërkohë, Zelensky ka njoftuar se dronët ukrainas kanë fundosur një anije kontejnerësh në pronësi ruse në Detin e Zi. Sipas tij, anija “Yanina”, me kapacitet rreth 100 mijë tonë dhe nën sanksione, është fundosur si rezultat i sulmit. Ukraina ka shënjestruar vazhdimisht anije me flamur rus në Detin e Zi që nga fillimi i pushtimit në shkallë të gjerë në vitin 2022, duke akuzuar Moskën se e përdor këtë rrugë për transportin e mallrave të sanksionuara, përfshirë naftën.
Sulmi ndaj Kievit vjen pas takimit të fundit të Zelenskyt me presidentin amerikan Donald Trump në Uashington, ku ai kërkoi nga Shtetet e Bashkuara leje për prodhimin e raketave përgjuese “Patriot”. Megjithatë, Trump deklaroi se SHBA-ja nuk ka marrë ende një vendim për këtë çështje, duke theksuar se bisedimet janë ende në vazhdim dhe se duhet treguar kujdes në lejimin e prodhimit të tyre nga vende të tjera.
Në anën tjetër, Ukraina ka rritur sulmet hakmarrëse në muajt e fundit, duke goditur objektiva strategjike dhe qendra logjistike që, sipas Kievit, përdoren nga Rusia për furnizimin e ushtrisë së saj./rtk
