Finalja e Ligës së Kampionëve, që zhvillohet nesër më 31 maj në Allianz Arena të Mynihut, përball Interin dhe Paris Saint-Germainin, ballafaqim ky historik për të dyja klubet.
PSG kërkon trofeun e parë evropian, ndërsa Interi synon titullin e katërt në histori.
Rrugëtimi i Paris Saint-Germain
PSG filloi sezonin me vështirësi në fazën e re të ligës së Ligës së Kampionëve, duke përfunduar në vendin e 23-të pas tetë ndeshjeve, çka i detyroi të luanin në fazën play-off. Një fitore vendimtare 4-2 ndaj Manchester Cityt në ndeshjen e fundit të fazës së ligës siguroi kualifikimin në play-off.
Në play-off, PSG dominoi Brestin me rezultat të përgjithshëm 10-0.
Ndërkaq, në 1/8 e finales, pasi humbën 0-1 në shtëpi ndaj Liverpoolit, PSG barazoi rezultatin në Anfield dhe fitoi me penallti 4-1.
E në çerekfinale, parisienëve iu ra sërish të luanin kundër një skuadre angleze, kësaj radhe Aston Villan, ku PSG fitoi me rezultat të përgjithshëm 5-4.
Kundërshtar anglez patën edhe në gjysmëfinale. Në një përballje të fortë me Arsenalin, PSG fitoi me rezultat të përgjithshëm 3-1.
Nën drejtimin e Luis Enrique-s, PSG ka ndryshuar strategjinë duke u fokusuar në lojtarë të rinj dhe një lojë kolektive, larg varësisë nga yjet si Messi, Neymar dhe Mbappe. Lojtarë si Ousmane Dembele dhe Khvicha Kvaratskhelia kanë qenë kyç në suksesin e skuadrës.
Rrugëtimi i Inter Milan
Inter përfundoi fazën e ligës në vendin e katërt, duke siguruar kualifikimin direkt në 1/8 e finales.
Në 1/8 e finales, Interi mposhti Feyenoordin me rezultat të përgjithshëm 4-1, teksa në çerekfinale u zhvillua një përballje dramatike me Bayern Munichun, ku italianët fituan me rezultat të përgjithshëm 4-3.
Nëse çerekfinalja nuk iu është dukur mjaftueshëm atraktive, Nerazzurrët u përkujdesën që fansat e futbollit t’i mbajnë pa frymë edhe në gjysmëfinale kundër Barcelonës.
Italianët avancuan tutje me një rezultat të përgjithshëm 7-6, duke përfshirë një barazim 3-3 në ndeshjen e parë dhe një fitore 4-3 në të dytën.
Nën drejtimin e Simone Inzaghit, Interi ka treguar një kombinim të disiplinës taktike dhe shpirtit luftarak. Lojtarë si Lautaro Martinez dhe Denzel Dumfries kanë qenë vendimtarë, ndërsa Francesco Acerbi ka qenë një figurë inspiruese, duke shënuar një gol të rëndësishëm në gjysmëfinale pas betejave personale me kancerin dhe depresionin.
Përballja Finale
Finalja e nesërme përfaqëson një përballje mes dy filozofive të ndryshme: PSG me lojën e saj të shpejtë dhe sulmuese, dhe Interi me disiplinën dhe përvojën e saj taktike. Pavarësisht formës së mirë të PSG-së dhe statusit të tyre si favoritë të lehtë, Interi ka treguar se është një kundërshtar i fortë dhe i papërmbajtshëm në këtë sezon.
Me të dyja skuadrat që kanë kaluar sfida të mëdha për të arritur në këtë pikë, finalja premton të jetë një spektakël i vërtetë futbolli.
