Presidentja e vendit, Vjosa Osmani ka përkujtuar sot masakrën në Pastaselë të Rahovecit dhe atë të Burimit të Malishevës, në 24-vjetorin e tyre.
Me këtë rast, Osmani ka thënë se dhimbja vazhdon të jetë po aq e madhe sikur në ditën e masakrës, raporton teve1.info
Ajo po ashtu ka theksuar se drejtësia për viktimat e regjimit serb dhe zbardhja e fatit të të zhdukurve me dhunë janë kërkesa të përhershme, nga të cilat nuk do heqin dorë.
“Sot kujtojmë masakrën e kryer nga forcat e regjimit gjenocidal të Serbisë në Pastaselë të Rahovecit, me ç‘rast u vranë dhe u masakruan 106 banorë të këtij fshati dhe fshatrave përreth. Në të njëjtën ditë në Burim të Malishevës, u vranë dhe u masakruan 42 civil. Dhembja vazhdon të jetë po kaq e madhe sikur në ditën e vrasjes së tyre, ndërsa kujtimi për ta i përhershëm. Drejtësia për viktimat e regjimit serb dhe zbardhja e fatit të të zhdukurve me dhunë janë kërkesa të përhershme tonat, nga të cilat ne nuk heqim dorë”, është shprehu ajo.
Në masakrën në Pastaselë janë vrarë dhe masakruar 106 persona nga ky fshat dhe fshatrat tjera përreth. Teksa në Malishevë, përkatësisht nga masakra e forcave serbe në Burim, u vranë dhe u masakruan 42 civilë shqiptarë.
