Deputetja e Lëvizjes Vetëvendosje Fitore Pacolli, ka komentuar ngërçin politik që po vazhdon në vend pas zgjedhjeve, duke theksuar nevojën për reagim më të shpejtë nga Gjykata Kushtetuese në lidhje me çështjen e konstituimit të Kuvendit të Kosovës.
Në një deklarim në “Këndin e debatit” në Tëvë1, Pacolli u shpreh se pavarësisht përpjekjeve të VV-së për të formuar institucionet, vonesa e vendimit të Kushtetueses po e zgjat bllokadën politike.
“Ne po përpiqemi që të krijojmë institucionet dhe të kemi një konstituim të Kuvendit, mirëpo Gjykata Kushtetuese do të duhej të ishte më e shpejtë,” deklaroi ajo.
Pacolli komentoi gjithashtu edhe padinë e paraqitur nga AAK-ja lidhur me formimin e Komisionit për Votimin e Fshehtë për zgjedhjen e kryeparlamentarit, duke thënë se e vlerëson si veprim të duhur.
Sipas saj, përgjigja nga Kushtetuesja pritet gjatë kësaj jave, dhe ajo shprehu shpresën që vendimi të jetë në favor të Lëvizjes Vetëvendosje.
“Në bazë të disa informatave që kemi jashtë procedurës zyrtare, pritet që gjatë kësaj jave të kemi një opinion apo një koment nga Gjykata Kushtetuese. Po shpresojmë të mos zvarritet më tutje,” tha Pacolli.
Ndërkohë, gjatë ditës është diskutuar edhe mundësia që Presidentja Vjosa Osmani të ndërmarrë hapin për ta dërguar këtë çështje në Kushtetuese, por nga Presidenca ende nuk ka një konfirmim zyrtar për një veprim të tillë.
