Gjykata Themelore e Gjakovës ia ka caktuar masën e paraburgimit prej një muaji pronarit të lokalit në Malishevë ku të premten dyshohet se u helmuan 205 qytetarë.
Këtë vendim e ka konfirmuar për RTK, udhëheqësi i Zyrës për Informim dhe Komunikim me Media i Gjykatës Themelore të Gjakovë, Lekë Muqaj.
Ai ka treguar se personi me inicialet K.Sh. dyshohet për veprën penale “prodhim dhe vënie në qarkullim të artikujve të dëmshëm ushqimor”.
Ndryshe ka shkuar në 205 numri i personave që dyshohet se u helmuan nga ushqimet në një lokal në Malishevë.
Lajmin e ka konfirmuar për RTK-n, Afrim Krasniqi, drejtor në Qendrën e Mjekësisë Familjare në Malishevë. Ai tha se gjendja e personave të helmuar ka filluar të përmirësohet, derisa theksoi se të gjithë ata që janë paraqitur për ndihmë mjekësore kanë pasur simptoma të njëjta, vjellje, temperaturë, ethe.
Disa janë duke u trajtuar në Spitalin e Prizrenit, disa në QKUK në Prishtinë”, tha ai. Ky është rasti i dytë i helmimit nga ushqimi i shpejtë brenda pak ditësh. Javën që lamë pas, 30 nxënës u helmuan në Mitrovicë.
