Në prag të përfundimit zyrtar të mandatit si i dërguar i BE-së për dialogun Kosovë, Serbi, Miroslav Lajçak zbuloi një nga planet e Brukselit për dialogun mes dy vendeve.
Lajçak në një intervistë për Radiotelevizionin e Serbisë, tha se BE-ja është duke e përgatitur një propozim të cilin kryediplomatja e re evropiane, Kaja Kallas dhe pasardhësi i tij, Peter Sorensen, do t’ia dorëzojnë palëve pas zgjedhjeve parlamentare në Kosovë, por nuk dha hollësi për të.
“Ne po përgatitemi që BE-ja të fillojë bisedimet në nivelin më të lartë, pas zgjedhjeve në Kosovë. Përfaqësuesja e re e Lartë e BE-së për Politikën e Jashtme dhe Sigurinë, Kaja Kallas, e ka bërë të qartë se do të jetë e përfshirë drejtpërdrejt dhe se dëshiron të udhëheqë procesin. Po përgatitet një qëndrim i BE-së, një propozim për të dyja palët. Sigurisht, nuk mund të flas për këtë më në detaje tani. Pasardhësi im, Peter Sorensen, i cili është një diplomat me përvojë dhe e njeh mirë Ballkanin, do të jetë aty për të ndihmuar Kaja Kallas në këtë punë”.
Qeveria e Kosovës ndërkaq deri më tani nuk e ka komentuar këtë paralajmërim të Lajcakut.
Në pyetjet drejtuar nga RTV21 se nëse ajo është e informuar për këtë propozim dhe se për çka bëhet fjalë, zyrtarë qeveritarë nuk kthyen ndonjë përgjigje.
Për ish-kryenegociatorin e Kosovës në dialogun me Serbinë, Avni Arifi, ky propozim i BE-së nuk pritet të jetë diçka e re përveçse i ndërlidhur me marrëveshjen e Brukselit dhe aneksin e Ohrit.
“Megjithëse është herët me ditë çka ka menduar Lajcaku ne nuk mund presim nga propozimi qe do te dalloj nga propozimet e deritashme. Çfarëdo që të jetë propozimi ai do të jetë i bazuar ne marrëveshjen e Brukselit dhe aneksin e Ohrit dhe obligimet që dalin nga palët. Se si ajo do te jete e formuluar dhe a mund të ketë një sekuencim të kërkuar pas marrëveshjes se Ohrit kjo është një pikëpyetje. Çkado që presim është një dokument ekzistues por vetëm me konsekuencat e tjera”, tha Arifi për rtv21
Ish-diplomati, Blerim Canaj ndërkaq nuk pret asgjë konkrete nga ky propozim të cilin e paralajmëroi Lajçaku.
“Dyshoj se ka diçka konkrete pasi që kemi administrata e re në ShBA e në BE dhe natyrisht tani edhe marrvegshjet bëhen konform situatave te reja te krijuara. Ndoshta mund te jetë një hap që pas një ndërmjetësimi të nëj dialogu dialogu që më shumë shihet si i dështuar të mund të jepet një ide që mund të mund të ndërlidhet edhe më marrëveshjen Ëashingotnit dhe zotimet e Brukselit e Ohrit”.
Miroslav Lajçak përfundon mandatin të premten, derisa nga 1 shkurti nis punën i emëruari i ri i BE-së për dialogun Kosovë-Serbi, Peter Sorensen.
Duke uruar Sorensenin, një ditë më parë, kryenegociatori i Kosovës, Besnik Bislimi, ka theksuar nevojën për angazhim dhe qasje të balancuar ndaj të dyja palëve në dialog si parakusht kyç për një proces të suksesshëm drejt normalizimit të plotë të marrëdhënieve.
