Mirlind Daku po shijon në këto ditë pushime të tij të verës në Shqipëri.
Por paralelisht, përfaqësues të tij po diskutojnë për të ardhmen e lojtarit, që do i garantojë fitime marramendëse, cilado qoftë zgjedhja e tij.
Pak ditë më parë, Daku ishte në bisedime me Zenit Saint Petersburg, por marrëveshja dështoi.
Gjatë ditës së sotme mediat ruse bëjnë të ditur se Dinamo e Moskës është gati të hidhet në sulm për sulmuesin shqiptar, duke i ofruar një pagë të lartë lojtarit i cili është nën kontratë me Rubin Kazan edhe për një tjetër vit.
Por ofertën më të mirë ai e ka marrë pikërisht nga Rubin Kazan për momentin. Mediat ruse bëjnë të ditur se Rubin Kazan i ka propozuar Dakut rinovimin deri në vitin 2029 me një pagë shumë më të lartë se sa e ka aktualisht.
“Sport Baza” shpjegon se atij i është propozuar një rrogë vjetore prej 200 milionë rublash (rreth 2,2 milionë euro), me një bonus besnikërie prej 150 milionë rublash (1,6 milionë euro) në çdo vit që vazhdon bashkëpunimin me klubin.
Nëse llogariten gjitha këto, atëherë Daku do të fitonte më shumë se 3,8 milionë euro në vit për nëse i shkon deri në fund kontratës që i propozohet.
Përfaqësuesit e futbollistit kanë marrë këtë propozim nga Rubin Kazan dhe po e shqyrtojnë me lojtarin paralelisht me ato që i ofrohen nga klube të tjera pasi është përfolur se për të ka interes edhe nga klube të Turqisë e Italisë.
Daku është pjesë e Rubin Kazanit nga sezoni 2023/24, teksa është ndër më të mirët në këtë skuadër.
Ai ka luajtur gjithsej 62 ndeshje me Rubin Kazanin dhe ka shënuar 25 gola e dhuruar 12 asistime./Arbresh.info
