Autoritetet serbe kanë lëshuar të shtunën një fletarrest për Dylot Brahimin, pjesëtar i Policisë së Kosovës dhe njëkohësisht gjyqtar futbolli në Superligën e Kosovës.
Fletarrestimi lidhet me incidentin e ndodhur në veri të Mitrovicës, ku një grup maturantësh shqiptarë festuan përfundimin e shkollës me flamuj dhe këngë në sheshin “Car Llazar”.
Gjatë festimeve u raportuan disa provokime, çka shtyu Policinë e Kosovës të ndërhyjë për të parandaluar përshkallëzimin e situatës.
Ministri i Punëve të Brendshme të Serbisë, Ivica Daçiq, deklaroi se ka lëshuar urdhërarrest për Brahimin, duke pretenduar se ai ka sulmuar fizikisht dhe ka lënduar një nxënës serb të shkollës së mesme në atë zonë.
Rasti ka nxitur reagime të shumta, edhe për shkak të profilit publik të Brahimit si zyrtar i rendit dhe gjyqtar në elitën e futbollit kosovar.
Në lidhje me rastin kishte reaguar edhe ministri në detyrë i Punëve të Brendshme të Kosovës, Xhelal Sveçla, i cili ka hedhur poshtë akuzat, duke i cilësuar ato si pjesë të propagandës së zakonshme serbe.
Sipas tij, ndërhyrja e policit ka qenë për të parandaluar provokimet dhe tensionet mes qytetarëve, por kjo është shtrembëruar qëllimisht nga autoritetet serbe.
