Presidenti i Turqisë, Recep Tayyip Erdogan, tha të enjten se vendi i tij ndërmerr të gjitha masat e nevojshme jashtë kufijve për sigurinë e tij, duke neutralizuar kërcënimet në burim pa kërkuar leje nga askush, raporton Anadolu, transmeton KosovaPost.
Duke folur gjatë një programi iftari me familje të dëshmorëve në Pallatin Cankaya në kryeqytetin Ankara, Erdogan tha se janë bërë përparime të rëndësishme në përpjekjet për një “Turqi pa terrorizëm”.
“Ka pasur një ulje serioze të rreziqeve të sigurisë ndaj vendit tonë, brenda dhe jashtë kufijve”, tha ai.
Duke iu referuar terrorizmit, Erdogan shtoi: “Jemi të vendosur ta çlirojmë Turqinë përgjithmonë nga ky mallkim që ka djegur zemrat e kombit tonë për pothuajse gjysmë shekulli”.
Ai theksoi se falë operacioneve të forcave të armatosura dhe njësi të tjera të sigurisë, “kemi kufizuar ndjeshëm lëvizshmërinë e organizatave terroriste”.
“Sot, mund t’i plotësojmë pothuajse të gjitha nevojat tona vetë në pothuajse çdo fushë, përfshirë dronët, dronët e armatosur, raketat, raketat balistike, anijet, helikopterët dhe tanket”, tha ai.
Ai shtoi se muajin e kaluar është arritur një marrëveshje për të zgjidhur çështjen në veri të Sirisë pa gjakderdhje, duke shtuar se “procesi drejt integrimit të plotë ka filluar”.
