Konsumimi i rregullt i frutave dhe perimeve është i lidhur shkencërisht me uljen e rrezikut të sëmundjeve kardiovaskulare. Por cilit frut t’i jepet përparësi? Nëse pyet kardiologët, përgjigja është: manaferrat, mollët dhe bananet.
“Manaferrat janë veçanërisht të pasura me antioksidantë dhe fibra. Përveçse janë të shëndetshme për zorrët, fibrat janë gjithashtu çelësi për shëndetin e zemrës duke ndihmuar në mbajtjen e kolesterolit në një nivel të shëndetshëm dhe parandalimin e rritjes së presionit të gjakut”, thotë kardiologia Joy Gelbman për Prevention.
Kardiologu Deepak Vivek i do më shumë mollët. Ato përmbajnë polifenole dhe flavonoide që kanë veti të rëndësishme antioksiduese. Përveç kësaj, mollët janë gjithashtu një burim i mirë i fibrave, vitaminës C dhe kaliumit, të cilat të gjitha mbështesin shëndetin kardiovaskular.
“Mollët kanë një indeks të ulët glicemik dhe konsumimi i ushqimeve të tilla ndihmon në uljen e rrezikut të diabetit dhe kolesterolit, që nga ana tjetër ndihmon në uljen e rrezikut të sëmundjeve kardiovaskulare”, shpjegoi Vivek, transmeton Klankosova.tv.
Kardiologia Sushant Khaire konsumon banane për shëndetin e zemrës.
“Bananet janë një burim i mirë i fibrave dietike, vitaminës C, vitaminës B6, kaliumit, magnezit dhe antioksidantëve. Këto lëndë ushqyese jo vetëm që mbështesin zemrën, por ndihmojnë edhe trupin në mënyra të tjera. Fibrat dietike ndihmojnë tretjen, vitamina C forcon sistemin imunitar dhe vitamina B6 është e rëndësishme për zhvillimin e trurit dhe nervave”, theksoi ai.
Frutat janë veçanërisht të dobishme për shëndetin e zemrës, sepse përmbajnë shumë vitamina dhe minerale, shkruan Index.hr, transmeton Klankosova.tv.
“Vlerësohet se 80 për qind e vdekjeve mund të parandalohen përmes dietës dhe mënyrës së jetesës”, thotë Dr. Gelbman.
Shoqata Amerikane e Zemrës rekomandon katër porcione frutash në ditë si pjesë e një diete të shëndetshme dhe të ekuilibruar.
