Presidentja e Sllovenisë, Natasa Pirc Musar, deklaroi në Forumin Diplomatik në Antalya se në Gaza po ndodh gjenocid, duke rikujtuar përvojën e Srebrenicës dhe duke theksuar se nuk është e vetmja kryetare shteti që bën thirrje për heqjen e vetos në Këshillin e Sigurimit të Kombeve të Bashkuara, raporton Anadolu, përcjell KosovaPost.
“Po, në Gaza, në Palestinë, po ndodh gjenocid, këtë e them hapur, sepse e di përkufizimin e gjenocidit”, theksoi ajo.
Ajo rikujtoi gjithashtu përvojën e luftës në Bosnje dhe Hercegovinë.
“Ne e kemi parë nga afër tmerrin e luftës dhe gjenocidit (në Srebrenicë) dhe për këtë arsye mbështesim fuqishëm popujt që vuajnë në mënyrë të ngjashme”, tha ajo.
Presidentja e Sllovenisë theksoi gjithashtu nevojën për reformimin e sistemit ndërkombëtar të vendimmarrjes.
“Nuk jam e vetmja kryetare shteti që bën thirrje për heqjen e vetos në Këshillin e Sigurimit të OKB-së”, deklaroi ajo.
Gjatë forumit, Pirc Musar mori pjesë në një bisedë me moderatorin Ali Arslan, ku foli për pasigurinë globale në rritje, krizën e rendit ndërkombëtar dhe nevojën për forcimin e rolit të vendeve me madhësi të mesme.
“Nëse fuqitë e mëdha nuk veprojnë, vendet e vogla dhe të mesme nuk duhet të qëndrojnë mënjanë — ato duhet të marrin vetë përgjegjësi për ruajtjen e paqes dhe sigurisë”, tha ajo.
Ajo shtoi se “interesat e përbashkëta janë me rëndësi të veçantë, dhe këto janë paqja, prosperiteti dhe siguria”, duke theksuar rëndësinë e platformave multilaterale.
Ajo theksoi veçanërisht rëndësinë e respektimit të së drejtës ndërkombëtare dhe rolit të Kombeve të Bashkuara në përballjen me luftërat dhe krizat.
“Situata në Lindjen e Mesme nuk është vetëm problem rajonal, por problem global që na prek të gjithëve. Është koha që komuniteti ndërkombëtar të thotë qartë: mjaft është mjaft. Duhet ta rikthejmë diplomacinë si gjuhën kryesore për zgjidhjen e mosmarrëveshjeve ndërkombëtare — thjesht për të mbrojtur njerëzit. Kudo”, deklaroi ajo.
