Presidenti rus, Vladimir Putin duket se po qëndron në gatishmëri të plotë nga frika e një përshkallëzimi të mundshëm të konfliktit në Ukrainë dhe përballja ushtarake me perëndimin. Edhe është shfaqur shumë rrallë në publik që nga pushtimi i Ukrainës, presidenti rus duket se po mban afër kudo valixhen e famshme bërthamore. Në fillim të javës, Vladimir Putin vizitoi papritur ushtarët rusë në frontin lindor të Ukrainës dhe vizita e tij në Luhansk dhe Kherson, tha zëdhënësi i Kremlinit, Dmitry Peskov, nuk ishte planifikuar paraprakisht. Dhe presidenti rus mori me vete “çantën e tij bërthamore”, sipas pamjeve që u shfaqën në mediat britanike. Tabloidet britanike shkruajnë gjithashtu se Putini ecte në mënyrë të pazakonshme gjatë daljes nga helikopteri në Kherson. Ai u pa gjithashtu duke dalë në mënyrë të sikletshme nga fuoristrada para se të përshëndetej nga komandantët në bazën ushtarake. “Ai dukej se po çalë teksa ecte drejt komandantëve të tij, ndërsa ndihmësi i tij u pa ndoshta duke mbajtur arkivolin famëkeq bërthamor”, shkruajnë britanikët.
Ndërsa Putin zbriste nga helikopteri, një burrë me rroba civile qëndroi pranë tij duke mbajtur një valixhe të zezë për të cilën mediat britanike thanë se ishte një “çantë bërthamore” që është pjesë e sistemeve të automatizuara të komandës dhe kontrollit të forcave strategjike bërthamore të Rusisë. Besohet se ka tre çantat e tilla në Rusi, dhe njëra është gjithmonë me presidentin. “Atij i pëlqen gjithmonë ta ketë atë çantë afër, sepse ajo i dërgon një mesazh Perëndimit dhe të tjerëve se Rusia është gati. Është gjithashtu një taktikë frikësimi, thonë njerëz nga rrethet e ngushta të Putinit”. Sipas doktrinës bërthamore të Rusisë, presidenti rus është vendimmarrësi përfundimtar kur bëhet fjalë për përdorimin e armëve bërthamore ruse, qofshin ato strategjike apo taktike. E ashtuquajtura çantë bërthamore ose “Cheget” është gjithmonë me Presidentin Putin. Ministri rus i Mbrojtjes Sergei Shoigu dhe shefi i Shtabit të Ushtrisë Ruse Valery Gerasimov gjithashtu besohet të kenë çantat e tilla.
Detaje nga çanta
Çanta është e lidhur me një sistem të veçantë komunikimi të koduar “Kavkaz”, i cili mbështet komunikimin midis zyrtarëve të lartë të qeverisë në momentet kur merren vendime për përdorimin e armëve bërthamore. Nëse Rusia beson se po përballet me një sulm strategjik bërthamor, Putini mund të përdorë një çantë për t’i dërguar një urdhër të drejtpërdrejtë lëshimit Komandës së Shtabit të Përgjithshëm, e cila mban kodet bërthamore. Putin ka kërcënuar mundësinë e një lufte bërthamore gjatë vitit të kaluar, pothuajse çdo herë që operacioni i tij ushtarak në Ukrainë lëkundet. Kjo mund të shpjegojë pse ai kohët e fundit vendosi të vendoste armë në Bjellorusi.
SHBA ngre alarmin
SHBA i ka kërkuar NATO-s të tregojë vigjilencë ndaj Rusinë, pasi mund të përdorë armë bërhamore në Ukrainë. Zëvendës Sekretarja e Shtetit, Wendy Sherman lëshoi paralajmërimin gjatë sesionit të hapjes së një konference vjetore të kontrollit të armëve të NATO-s që po mbahej në Amerikën e Veriut për herë të parë që nga fillimi i saj në 2004, shkruajnë mediat e huaja. “Ne të gjithë kemi parë dhe jemi shqetësuar se Vladimir Putin do të përdorte atë që ai e konsideron një armë bërthamore taktike jostrategjike ose do të përdorte ndonjë efekt demonstrues për të përshkallëzuar, por në një përshkallëzim të menaxhuar të rrezikut. Është shumë kritike të mbetemi vigjilent për këtë”, tha Sherman. Sipas Sherman, njoftimi i Putinit më 25 mars se Rusia po përgatitet të vendosë armë bërthamore taktike në Bjellorusinë fqinje është përpjekja e tij për ta përdorur këtë kërcënim në një mënyrë të menaxhuar. Në një fjalim televiziv, presidenti Vladimir Putin njoftoi planet për të vendosur armë bërthamore taktike në Bjellorusi, e cila është aleati fqinj i Rusisë. Armët që Putin planifikon të transferojë në Bjellorusi nuk janë raketa balistike ndërkontinentale, por armë bërthamore më të vogla, më taktike për përdorim në fushën e betejës.
