Presidenti ukrainas Volodymyr Zelensky iu është drejtuar rusëve duke u thënë se lideri i tyre po u shkatërron vendin.
Ai foli pasi Vladimir Putin mbajti një fjalim për Vitin e Ri të rrethuar nga njerëz me uniformë ushtarake.
Zelensky tha se presidenti rus fshihej pas trupave të tij, jo duke i udhëhequr ato.
Të shtunën pati një sërë sulmesh vdekjeprurëse në të gjithë Ukrainën dhe Zelensky tha se ukrainasit nuk do ta falnin Rusinë.
Të paktën një person vdiq dhe dhjetëra u plagosën nga sulmet.
Pati sulme të tjera raketore në Kiev vetëm disa orë pas vitit të ri të dielën, thanë zyrtarët. Nuk pati raportime për viktima.
Por sulmet, të cilat erdhën në orët e para të 2023, nxitën zemërim dhe urrejtje tek ukrainasit tashmë të lodhur nga sulmet e pandërprera ajrore te Rusisë.
Ndërsa shpërthimet tronditën kryeqytetin, disa banorë kënduan himnin kombëtar, ndërsa zyrtarët akuzuan Rusinë se synonte qëllimisht civilët ndërsa ata u mblodhën për të festuar Vitin e Ri.
Kreu i forcave të armatosura të Ukrainës, Valerii Zaluzhny, tha se mbrojtja ajrore kishte rrëzuar 12 nga 20 raketat ruse të shtunën.
Sulmet ndodhën dy ditë pas një prej sulmeve ajrore më të mëdha që nga fillimi i luftës. Dhjetra sulme në javët e fundit kanë shkaktuar ndërprerje të vazhdueshme të energjisë elektrike.
Moska ka mohuar në mënyrë të përsëritur se ka shënjestruar civilët, por Putin ka pranuar së fundmi se ka goditur objekte kritike të energjisë.
Në një fjalim në kanalin e tij Telegram, Zelensky tha se ata që kryen sulmet e së shtunës ishin çnjerëzorë.
Duke kaluar nga ukrainasja në rusisht, ai më pas sulmoi zotin Putin.
“Udhëheqësi juaj dëshiron t’ju tregojë se ai po udhëheq nga fronti dhe ushtria e tij është pas tij. Por në fakt ai fshihet. Ai fshihet pas ushtrisë së tij, raketave të tij, mureve të rezidencave dhe pallateve të tij. Ai fshihet pas jush dhe po djeg vendin dhe të ardhmen tuaj. Askush nuk do t’ju falë për terrorin. Askush në botë nuk do t’ju falë për këtë. Ukraina nuk do t’ju falë”, tha ai.
Zelensky më vonë mbajti një fjalim për vitin e ri drejtuar popullit ukrainas, duke i falënderuar ata për përpjekjet e tyre “të pabesueshme” në zmbrapsjen e ruseve.
“Ne luftojmë si një ekip – i gjithë vendi, të gjitha rajonet tona. Unë ju admiroj të gjithëve. Dua të falënderoj çdo rajon të pamposhtur të Ukrainës,” tha ai.
