Qendra “Gjenocidi në Kosovë – Plagë e hapur” u është drejtuar me një letër krerëve të institucioneve, deputetëve dhe kryetarëve të partive politike të përfaqësuara në Kuvendin e Kosovës, duke kërkuar shpalljen e gjendjes së jashtëzakonshme dhe zhbërjen e Gjykatës Speciale.
Në letër, Qendra e ka cilësuar vendimin e 16 shtatorit të Dhomave të Specializuara të Kosovës si një goditje të rëndë ndaj dispozitave themelore të Kushtetutës së Kosovës.
“Aktgjykimi politik i Dhomave të Specializuara të Kosovës i datës 16 shtator 2026 është një goditje e rëndë ndaj dispozitave themelore të Kushtetutës së Kosovës, sepse realizimin e pavarësisë së shtetit tonë e konsideron si rezultat të vrasjeve sistematike, arrestimeve, ndalimeve, trajtimeve çnjerëzore dhe formave të tjera të dhunës, që janë në kundërshtim të plotë me normat e së drejtës së përgjithshme humanitare ndërkombëtare. Të brengosur për shkak të rrezikut që ngërthen në vetvete ky vendim për pavarësinë e shtetit të Kosovës, Qendra “Gjenocidi në Kosovë – Plagë e hapur” ju drejtoi memorandumin për shpalljen e gjendjes së jashtëzakonshme dhe zhbërjen e të ashtuquajturës “Gjykatë Speciale””, thuhet në letër.
Qendra ka ngritur gjithashtu shqetësime lidhur me përbërjen e panelit të Apelit, duke theksuar se, sipas saj, gjyqtarët e caktuar kanë qenë pjesë e paneleve të mëparshme në raste të tjera të Dhomave të Specializuara. Për këtë arsye, ajo vlerëson se edhe rezultati i procesit të Apelit mund të jetë i njëjtë me vendimet e mëparshme, të cilin e ka cilësuar si “DÉJÀ VU”.
“Si në çdo proces politik, për të shmangur befasitë, sajuesit e procesit që kishte për qëllim kriminalizimin e luftës për pavarësi të Kosovës nga Serbia, përcaktuan gjykatësit që kanë qenë pjesë e paneleve të mëparshme të Apelit në rastin e Hysni Gucatit dhe Nasim Haradinajt, Salih Mustafës dhe Pjetër Shalës.Prandaj rezultati i vendimit të Panelit të Apelit është DÉJÀ VU!Në këtë kontekst të jashtëzakonshëm, çështja e shpalljes së gjendjes së jashtëzakonshme dhe abrogimi i nenit 162 të Kushtetutës së Kosovës janë imperativ kategorik!”, thuhet më tej..
Në përfundim të letrës, Qendra thekson se, sipas saj, vetëm zhbërja e Dhomave të Specializuara të Kosovës dhe e Zyrës së Prokurorit të Specializuar mund ta mbrojë Kosovën nga ajo që e cilëson si një rrezik të madh për vendin.
