Nuk jemi shënjestrat tuaja” ishte sllogani i një tjetër proteste të mbajtur në Beograd, në vendin e njohur si “te Londra”, ku sipas dëshmive të mijëra pjesëmarrësve më 15 mars, gjatë një proteste masive kundër manipulimit zgjedhor, u përdor një armë zanore ende e paidentifikuar. Qytetarët vazhdojnë të kërkojnë përgjigje për pyetjen – kush dha urdhrin për përdorimin e topit zanor kundër protestuesve?
Në protestën që filloi në orën 19:00, thirrur nga organizata joformale e nxënësve të shkollave të mesme të Beogradit, PULS, organizatorët deklaruan: “U kthyem në vendin ku u përdor topi zanor për të realizuar 15 minutat e heshtjes që atëherë u ndërprenë.”
Protesta filloi me një heshtje 17-minutëshe, në nderim të viktimave të tragjedisë në Novi Sad, ku nga shembja e strehës në stacionin hekurudhor humbën jetën 16 persona, si dhe në kujtim të të vdekurve në zjarrin në Maqedoninë e Veriut.
Pjesëmarrësit qëndruan në heshtje, të kthyer nga Sheshi i Slavijës, duke mbajtur të ndezura dritat e telefonave dhe vizatime me shënjestra ku shkruhej: dashuri, drejtësi, dinjitet dhe dije.
Mesazhi i protestës ishte që: institucionet duhet të marrin përgjegjësi, dhe përdorimi i forcës ndaj qytetarëve paqësorë nuk guxon të mbetet pa pasoja.
“Ky është një çështje jete,” tha një pjesëmarrëse. “Nuk ka rëndësi nëse është top, mund të jetë edhe korrupsioni, një fjalë e keqe, ndalimi për të punuar, të gjitha këto kërkojnë luftë dhe drejtësi”, tha ajo.
Një tjetër pjesëmarrëse shtoi: “Nuk është frikë ajo që ndjejmë, por guxim i shtuar. Studentët e nisën këtë betejë, dhe ne do të jemi përkrah tyre deri në momentin kur do të ndodhin ndryshimet që janë të natyrshme dhe të domosdoshme.”
Edhe pse autoritetet ditëve të fundit kanë pranuar se policia posedon një pajisje të tillë, ato kanë mohuar përdorimin e saj gjatë protestës. Megjithatë, shumë qytetarë nuk janë të bindur, duke pretenduar se më 15 mars u dëgjua një “zë jashtëzakonisht i fortë” që shkaktoi panik, dhembje në veshë dhe dhimbje koke.
Organizatat për të drejtat e njeriut kanë paralajmëruar se përdorimi i një mjeti të tillë, topi zanor, përbën shkelje serioze të së drejtës për tubim paqësor.
Ndërkohë, protestat qytetare dhe studentore vazhdojnë në mbarë Serbinë. Qytetarët kërkojnë drejtësi dhe përgjegjësi politike e penale nga pushteti, organizojnë tubime ne lagje, ne fshatra, ne menyre spontane përpara institucioneve lokale.
Në disa qytete, zyrtarë të Partisë Përparimtare Serbe janë përballur me vërshëllima, jan gjuajtur me vezë dhe shishe uji nga qytetar te revoltuar, dhe në disa raste nuk kanë mundur të mbajnë tubimet e planifikuara.
Në përgjigje të kësaj situate, presidenti i Serbisë, Aleksandar Vuçiq, u bëri thirrje policisë dhe prokurorisë që të “veprojnë me vendosmëri, në çdo moment dhe në çdo vend” për të “mbrojtur rendin dhe ligjin”, siç deklaroi ai.
Vuçiq gjithashtu deklaroi se “në Serbi kanë hyrë shumë para” për të “zbatuar një revolucion me ngjyra”, por shtoi se nuk do të tërhiqet nga politika e tij, përkundrazi, “do të luftojë më fort dhe më fuqishëm.”
Tensionet shoqërore po rriten, ndërsa pyetjet pa përgjigje, si ajo për përdorimin e topit zanor, po bëhen simbol i një pakënaqësie më të gjerë ndaj pushtetit aktual, nga i cili qytetarët kërkojnë që më në fund të lejojë institucionet të bëjnë punën e tyre.
