Prej ditësh situata në veri të Kosovës, vijon të jetë mjaft e tensionuar, ku ka pasur shpeshherë edhe përplasje mes policisë kosovare dhe qytetarëve serbë.
Kryeministri i vendit, Edi Rama tha në “Opinion” se është takuar me Kurtin dhe Osmanin, por nuk kanë pasur diskutime, sepse sipas tij është një çështje për të cilën janë ata që duhet të vendosin nëse duan të diskutojnë apo jo.
Rama: Unë e shoh çfarë po ndodh dhe nuk është se ata janë fshehur, janë shumë të qartë në atë se çfarë thonë.
Asnjë komunikim mes Shqipërisë dhe Kosovës në nivel zyrtar?
Rama: Jo, sepse është një çështje që është përgjegjësi dhe kompetencë e plotë e kryeministrit të Kosovës dhe në njëfarë mase dhe e presidencës. Janë ata që vendosin nëse dëshirojnë apo jo të diskutojnë mbi këtë çështje. Nuk jam unë që i marr dhe i them se si do bëni për këtë punë. Është respekt për ta dhe institucionet e Kosovës, sipas meje.
Kosova është konsultuar gjithmonë me Shqipërinë.
Rama: Është konsultuar Kosova kur ka dëshiruar të konsultohet, kur nuk dëshiron të kosnultohet është totalisht në të drejtën e vet të mos konsultohet. Nuk ka kërkuar të diskutojë këtë gjë me mua apo me ne në qeveri dhe është në të drejtën e vet që mos e diskutojë këtë gjë. Ne nuk jemi indiferentë.
Rama shtoi se në rastin konkret nuk ka asgjë për tu shqetësuar sepse është e drejta e Kosovës që mos konsultohen dhe ëshët e drejta e tyre që t’i bëjnë me dije vendimet e tyre përmes medieve.
Cili është qëndrimi i qeverisë shqiptare?
Rama: Qëndrimi ynë është shumë i qartë, kjo është një situatë e rrezikshme dhe e panevojshme.
Kush është përgjegjës?
Rama: Nuk më takon mua të nxjerr përgjegjësit. Në Moldavi kanë qenë të pranishëm të gjithë liderët e Evropës dhe disa vendeve të tjera dhe qëndrimi unik i të gjithë liderëve të BE-së është qëndrim i njëjtë me atë të SHBA-së, që kjo situatë është e papranueshme dhe ka dy gjëra për të bër, serbët duhet të kthehen në institucione, Kosova duhet të shpallë zgjedhje të reja menjëherë që situata të vihet në vend.
