Shqipëria i ka dhënë “dritën jeshile” projektit për forcimin e kapaciteteve të saj mbrojtëse dhe zhvillimin ekonomik, përmes krijimit të një qendre të re prodhimi të industrisë ushtarake në vend. Ky projekt, tha kryeministri Edi Rama, ka si objektiv modernizimin dhe prodhimin e industrisë ushtarake për Forcat e Armatosura dhe për eksport.
Nga Rubiku, Rama ka theksuar rëndësinë e këtij investimi strategjik, i cili do të krijojë mundësi të reja punësimi për një gamë të gjerë specialistësh dhe do të rrisë pagat në sektorin ushtarak. Sipas tij, ky projekt është një hap i rëndësishëm për të fuqizuar mbrojtjen dhe ekonominë e vendit, duke siguruar një rritje të kapaciteteve prodhuese dhe mundësi të reja në fushën e mbrojtjes dhe të eksportit.
Në kuadër të këtij investimi, do të prodhohen dronë inteligjentë, automjete ushtarake dhe pajisje të tjera moderne për Forcat e Armatosura, të cilat do të shërbejnë për rritjen e sigurisë kombëtare dhe do të eksportohen në tregjet ndërkombëtare.
“Hapja e një faqe të re në fushën e mbrojtjes dhe të ekonomisë nis me investimet e para për krijimin e qendrave të prodhimit të industrisë ushtarake, ku do të prodhohet për Forcat tona të Armatosura, por edhe për eksport. Kjo do të thotë një front i ri punësimi pasi këtu kërkohen një seri specialitetesh dhe duke zhvilluar këtë industri nuk rrisim vetëm kapacitete tona mbrojtëse por rrisim në mënyrë të ndjeshëm ekonominë tonë. E kemi nisur këtë konceptim që pas nisjes së luftës së Rusisë në Ukrainë dhe filozofia jonë është që investimet në rritje për mbrojtjen, ne i kemi kanalizuar fillimisht për disa gjëra themelore që mungonin. Synojmë të rrisim paga çdo vit për të arritur në mesataren e NATO-s dhe kjo ka sjellë rritje të interesit për t’u bërë pjesë e Forcave të Armatosura.
Duhet të investojmë për të fituar dhe për të ri-investuar. Të investojmë asetet e ushtrisë që janë keqpërdorur për shumë vite ku kam parasysh pronat. Në rast se pronat nuk i duhen drejtpërdrejtë ushtrisë do investohen me pjesëmarrjen e Ministrisë së Mbrojtjes por të vihen në funksion të turizmit apo zhvillime të tjera. Fuqizojmë ndërmarrjen publike të prodhimit dhe të shitjes së mjeteve ushtarake. Kjo do të na sjellë jo vetëm të ardhura, por edhe rritje të kapaciteteve në këtë vend. Do krijojë mundësi për inxhinierë dhe specialistë të nivelit të lartë në këtë sektor. Një nga element që do të prodhojmë në bazë të këtij programi janë edhe dronët inteligjentë, që janë fjala e fundit e shkencës dhe risia më e madhe sot në sektorin e mbrojtjes. Tjetra që është e rëndësishme është që këto qendra do të jenë të ndara në disa pika të territorit dhe si kapacitetet të tyre do të profilizohen në prodhime të llojeve të ndryshme”, tha Rama.
Kryeministri theksoi gjithashtu se janë duke u bërë investime të tjera për forcimin e kapaciteteve të forcave ajrore dhe detare, duke përfshirë hapjen e Akademisë së Pilotëve të Forcave Ajrore dhe modernizimin e industrisë së riparimit të anijeve.
“Jemi duke bashkëpunuar me partnerët tonë të afërt dhe së shpejti ky program do të nis në qendrën ushtarake në Rubik. Pjesë e investimeve janë edhe automjetet ushtarake. Do prodhojmë këtu në vend makina ushtarake për FA dhe do të eksportohen masivisht jashtë. Jemi duke përgatitur hapjen e Akademisë së Pilotëve të Forcave Ajrore, ku do të fillojë edhe përgatitja e pilotëve shqiptare dhe synimi është që t’i shërbejë edhe forcave aleate dhe besoj se në vijim në Vlorë do të bëjmë edhe firmosjen për fillimin e punës për Akademinë Shqiptare të Forcave Ajrore. Në bashkëpunime Italinë po rrisim kapacitete e forcave detare dhe po punojmë për ri ngritjen e bazës së prodhimit dhe riparimit të anijeve në Shqipëri që do na jap mundësi të prodhojmë për vetën dhe të ekspertojmë. Po i çelim dritën jeshile fillimit të një industrie shqiptare të mbrojtjes”, tha Rama. rtsh
