Deputeti i zgjedhur i LDK-së, Anton Quni ka reaguar pasi rinumërimi i votave ka nxjerrë në pah parregullësi dhe prekje të votave për disa kandidatë, përcjell KosovaPost.
Qunit që pas rinumërimit i janë hequr mbi 400 vota, ka thënë se çdo rritje e votave në emrin e tij është bërë pa deshjen dhe dijeninë e tij.
Ai thotë se nuk ka kërkuar, inkurajuar apo asistuar në asnjë formë devijimin e vullnetit të qytetarëve.
Quni ka thënë se përmes këtij operacionit, i është njollosur personaliteti dhe karriera dhe se përfshirja e emrit të tij në skema të tilla manipuluese është një goditje e rëndë për dinjitetin dhe besueshmërinë që ka ndërtuar me vite para elektoratit.
Postimi i plotë:
DEKLARATË PËR MEDIAT DHE OPINIONIN PUBLIK
Në lidhje me zhvillimet e fundit dhe raportimet mbi procesin e numërimit të votave në Qendrën e Numërimit në Prizren, ndjej detyrim moral dhe qytetar që të sqaroj pozicionin tim ndaj këtyre parregullsive që cenojnë procesin zgjedhor.
Dëshiroj të bëj të ditur me përgjegjësi të plotë se çdo rritje e votave në emrin tim është bërë pa dashjen dhe pa dijeni timen. Unë nuk kam kërkuar, inkurajuar apo asistuar në asnjë formë devijimin e vullnetit të qytetarëve. Kjo ngritje artificiale e votave nuk përfaqëson mbështetjen time reale dhe as parimet e mia njerëzore.
Përmes këtij operacioni, i cili nuk mund të cilësohet ndryshe veçse si kriminal, më është njollosur personaliteti dhe karriera. Përfshirja e emrit tim në skema të tilla manipuluese është një goditje e rëndë për dinjitetin tim dhe besueshmërinë që kam ndërtuar me vite para elektoratit.
Motivin dhe qëllimin e vërtetë prapa këtij operacioni kriminal duhet ta vërtetojnë institucionet e drejtësisë.
Unë jam i interesuari që të zbardhet e vërteta:
-Pse u zgjodh emri im për këtë manipulim?
-Kush janë urdhërdhënësit dhe ekzekutorët në Qendrën e Numërimit?
U kërkoj ndjesë publike të gjithë kolegëve kandidatë, votat e të cilëve mund të jenë tjetërsuar në favorin tim.
Garimi duhet të jetë i drejtë dhe çdo votë e fituar me meritë duhet të shkojë te personi që e ka marrë atë besim.
Deklaroj se jam plotësisht i gatshëm të bashkëpunoj me Policinë, Prokurorinë dhe çdo organ tjetër të drejtësisë për të zbardhur këtë skandal deri në fund.
E vërteta është mbrojtja ime e vetme.
Me respekt,
Anton Quni
