Shkëlzen Gashi dhe Milot Cakaj kanë zhvilluar një debat në kujtim të veprimtarit të njohur të çështjes kombëtare Adem Demaçi, në pesëvjetorin e vdekjes së tij. Dy ish-bashkëpunëtorët e bacës Adem në periudha të ndryshme, kanë treguar për lidhjen e tyre me të.
Shkëlzen Gashi ka treguar se ai në vitet 2008, 2009 dhe 2010 është marrë me jetën dhe veprën e tij dhe më pas e ka botuar një biografi për Bacën Adem, derisa Milot Cakaj, ka treguar se gjatë periudhës kur Demaçi ishte përfaqësues i përgjithshëm i UÇK-së me zyre në Prishtinë, ai ka qenë pjesë e sekretariatit për media.
“Fillimisht për bacën Adem kam dëgjuar para vitit 1990 kur ai ende ka qenë në periudhën e vuajtjes së dënimit. Prej atëherë është përmendur dikush që e ka emrin Adem Demaçi dhe që ka qenë një idol për një pjesë të madhe të njerëzve. Ka qenë një person që kemi dëgjuar për të, është folur për të dhe që për momentin është në vuajtje të dënimit. Ka pas shumë pak informata për bacën Adem në atë periudhë, derisa në vitet e 90-ta vjen dalja nga burgu dhe kthimi i tij, e më pas edhe shfaqja e tij në skenën shoqërore dhe më vonë edhe në skenën politike. Edhe pse parimisht kur flitet për bacën Adem është vështirë me nda çfarëdo që ka bërë ai prej politikës”, ka theksuar Cakaj.
Ndërkaq, Shkëlqen Gashi ka theksuar se kanë qenë vitet 1996/97 kur ishte në shkollën e mesme “Sami Frashëri”, kur ka filluar të përcjellë politikën, pasi sipas tij ajo në atë periudhë ishte bërë më dinamike.
“Në atë kohë më ka bërë shumë përshtypje se është një person që i ka bërë 28 vjet burg. Është interesant se në klasë kemi qenë diku 30 veta, 29 kanë qenë me kundërshtarin e tij politik, me Rugovën në atë kohë, dhe unë isha i vetmi që isha me bacën Adem. Dhe kjo ka qenë ndoshta përvoja më interesante për mua në vitet e 90-ta sepse jam mësuar qysh duhet të debatojë, duke polemizuar me nxënës por edhe me arsimtarë”, ka rrëfyer Gashi.
Ai tha se për herë të parë Adem Demaçin e ka parë pas luftës. “…dhe më është dukur shumë interesant sepse parafytyrimi që e kam pasur për të ka qenë që është shumë i madh, por kur e kam parë doli si të them njeriu i vogël i madh”, ka shtuar Gashi.
Ndërkaq, Cakaj tha se për herë të parë e ka parë kur baca Adem ka qenë drejtues i Këshillit për Liritë dhe të Drejtat e Njeriut e më pas e ka takuar kur ka qenë udhëheqës i Partisë Parlamentare.
“Të them bashkëpunëtor i tij është kompliment për veten, për të mos thënë punëtor i tij në zyrën e përfaqësuesit të përgjithshëm të UÇK-së. Realisht ka qenë një disproporcion total midis personalitetit dhe prezencës që e ka pasur si njeri baca Adem dhe normal fizikusit të tij. Në parim atë përshtypje që e ke pasur ti Shkëlzen e kam dëgjuar edhe nga shumë të tjerë. Kanë pritur një person shumë ma korrpulent se sa ka qenë baca Adem, por sigurisht edhe ti e ke pasur atë përvojë se Baca Adem e ka pasur një personalitet të veçantë në kuptimin që ka qenë shumë e vështirë të mos e vëresh. Nëse ai ka qenë aty gjithkush e ka ditur se ai ka qenë aty. Jo se ka qenë shumë i zhurmshëm dhe korrpulent por ka qenë një person që ka rrezatuar me prezencë dhe e ka krijuar një atmosferë që njerëzit e kanë ditur që ai është aty”, ka shtuar gjatë këtij bashkëbisedimi Milot Cakaj.
Më tej Miloti ka treguar për periudhën gjashtë mujore sa ka qenë bashkëpunëtor me Adem Demaçin prej gushtit të vitit 1998 deri në mars të vitit 1999. “Ai e ka pasur një komunikim të jashtëzakonshëm. E ka pasur një strukturë jo shumë komplekse të fjalisë, por atë që e ka thënë e ka thënë me bindje të plotë. Kur ka fol baca Adem ke qenë i sigurt se ashtu po mendon dhe që e ka përnjëmend. Ajo bindja që ka qenë e strukturuar në fjalinë e tij nuk ka lënë kurrë ndonjë hapësirë dyshimi që ai nuk mendon ashtu. Ka qenë shumë i prerë, shumë fjalëshpat, elokuent dhe jashtëzakonisht i bindur çfarëdo që ka thënë. Ke mund mos të pajtohesh ose jo me të, po në atë çfarë ka thënë nuk ke dyshuar në asnjë moment që ai ashtu edhe po mendon”, ka thënë tutje Cakaj.
Sipas tij çdo fjali e bacës Adem ka qenë diçka që e ke marrë si komunikim shumë të veçantë, e që nuk e ke pasur me njerëzit e tjerë.
“Kur bisedon me njerëzit e tjerë e ki një farë dileme e një farë dyshimi çfarë po donë të thotë, me Bacën Adem kurrë s’ka qenë ajo dilemë. Ai ka qenë jashtëzakonisht shumë i drejtpërdrejt, por kurrë ofendues”, ka shtuar Cakaj.
