Rusia ka ndërmarrë një sulm të fuqishëm me raketa balistike dhe dronë ndaj Ukrainës, duke lënë të paktën 14 persona të vrarë dhe 22 të tjerë të plagosur. Bëhet fjalë për një nga sulmet më vdekjeprurëse ndaj Kievit gjatë këtij viti.
Sulmi nisi pak pas mesnatës së së mërkurës, ndërsa shefi i administratës ushtarake të Kievit, Timur Tkachenko, deklaroi se “armiku po sulmon edhe një herë në mënyrë masive rajonin e Kievit”, shkruan BBC, transmeton Klankosova.tv.
Alarmet ajrore zgjatën për më shumë se një orë, ndërsa valë raketash balistike goditën kryeqytetin ukrainas dhe zonat përreth. Sipas autoriteteve lokale, sulmi shkaktoi dëme të mëdha në ndërtesa banimi dhe depo.
Tkachenko bëri të ditur se nëntë persona humbën jetën në distriktin e Boryspilit, katër në distriktin e Buchas dhe një në distriktin e Fastivit.
Pas sulmit, Ukraina u bëri sërish thirrje aleatëve të saj që të furnizojnë vendin me më shumë sisteme amerikane Patriot, të cilat përdoren për mbrojtje kundër raketave balistike ruse.
Nga ana tjetër, Ministria ruse e Mbrojtjes deklaroi se kishte goditur qendra logjistike dhe furnizimi në Kiev dhe rrethinat e tij.
Sipas Moskës, objektivat e goditura përdoreshin për ruajtjen dhe shpërndarjen e armëve, furnizimeve ushtarake, si dhe për prodhimin dhe shpërndarjen e dronëve.
Ministria ruse shtoi gjithashtu se kishte goditur edhe tre anije mallrash pranë portit të Odesës në Detin e Zi, duke pretenduar se ato transportonin armë dhe pajisje ushtarake. Këto pretendime nuk janë konfirmuar në mënyrë të pavarur.
