Policia e Kosovës ka zhvilluar një operacion kundër kontrabandës në Ferizaj, ku ka sekuestruar një sasi të madhe mallrash ilegale.
Sipas njoftimit zyrtar, rasti është iniciuar pas pranimit të informatave për një depo të dyshuar. Më pas, janë ndërmarrë veprime operative dhe hetimore që kanë çuar në zbulimin e mallrave të kontrabanduara.
Autoritetet kanë identifikuar një person të dyshuar, mashkull kosovar, për të cilin dyshohet se e kishte përdorur hapësirën për ruajtjen e produkteve të futura ilegalisht në Kosovë përmes rrugëve të paligjshme nga Maqedonia e Veriut.
Policia ka bërë të ditur se gjatë kontrollit në lokacionin e dyshuar, janë gjetur dhe sekuestruar:
- 800.4 kilogramë duhan i përpunuar
- 94 kilogramë mjaltë
- 30.4 kilogramë ambalazh plastik
- 178 kilogramë ambalazh letre
- Një makinë për përpunimin e duhanit
- Një makinë për përpunimin e ambalazhit
- Një spërkatëse uji për trajtimin e duhanit
Vlera e përgjithshme e mallrave të konfiskuara llogaritet rreth 16,500 euro, ndërsa dëmi i shkaktuar përmes shmangies së akcizës dhe detyrimeve doganore vlerësohet të arrijë rreth 34,000 euro.
