Kryetari i Komisionit të Senatit Amerikan për Inteligjencën, senatori Mark Warner, tha se është shumë e rëndësishme që të vazhdojë armëpushimi në Rripin e Gazës, si dhe është shumë e rëndësishme që Izraeli të lëshojë në qarkullim fondet për ndihmë palestineze, transmeton Kosova Post.
Në një intervistë për rrjetin MSNBC, ai tha se Izraeli ka humbur simpatinë e njerëzve në mbarë botën dhe se duhet të tregojë mirëbesim duke çliruar ndihmat për palestinezët.
Senatori Warner shpreson se armëpushimi aktual midis Izraelit dhe Lëvizjes së Rezistencës Islamike Hamas do të vazhdojë për aq kohë sa të jetë e mundur, në mënyrë që të lirohen sa më shumë të burgosur.
Frika nga hapja e një fronti tjetër
Senatori amerikan shprehu shqetësimin për mundësinë që Autoriteti Palestinez të braktiste përgjegjësitë e tij të sigurisë në Bregun Perëndimor, gjë që do të shkaktonte kaos dhe do të hapte një front të dytë lufte kundër Izraelit, por kjo nuk ndodhi.
Përpara se të hynte në një armëpushim të përkohshëm humanitar të premten e kaluar, ushtria okupatore izraelite, e cila nisi një luftë shkatërruese në Rripin e Gazës më 7 tetor , la pas më shumë se 15,000 të vdekur.
Më shumë se 10,000 të vrarë ishin fëmijë dhe gra, ndërsa rreth 7,000 palestinezë janë të zhdukur dhe numri i të plagosurve i ka kaluar 36,000./KosovaPost/
