SHBA-ja dhe Irani janë pranë një marrëveshjeje për Ngushticën e Hormuzit, pavarësisht qëndrimeve të tyre të ashpra ndaj ngërçit të vazhdueshëm, tha ministri pakistanez i Mbrojtjes, Khawaja Asif, transmeton Anadolu.
Asif i tha Bloombergut se Washingtoni dhe Teherani janë “pranë një lloj marrëveshjeje” për ngushticën pothuajse të mbyllur, e cila ka qenë pika kryesore e mosmarrëveshjeve që kanë penguar bisedimet mes dy palëve ndërluftuese.
Deklarata e tij vjen ndërsa ministri i Brendshëm pakistanez Mohsin Naqvi po zhvillon takime me udhëheqjen iraniane në Teheran, në kuadër të përpjekjeve të ripërtërira të Islamabadit për zgjidhjen e ngërçit në Hormuz dhe rifillimin e bisedimeve të pezulluara.
Një burim i qeverisë pakistaneze i tha Anadolu se Naqvi do t’i paraqesë udhëheqjes iraniane “disa propozime të reja” për zgjidhjen e ngërçit, i cili vazhdon të dëmtojë ekonominë dhe tregtinë globale.
Burimi, megjithatë, nuk dha detaje rreth propozimeve të reja.
Naqvi, së bashku me kryeministrin Shehbaz Sharif dhe shefin e ushtrisë, Asim Munir, ka qenë aktivisht i përfshirë në procesin e ndërmjetësimit.
Asif tha gjithashtu se “gjërat po zhvillohen në favor të paqes”, por nuk dha detaje për ndonjë përparim.
“Sinjalet në dy-tre ditët e fundit janë se jemi pranë një lloj marrëveshjeje”, shtoi ai.
Një zëdhënës i Ministrisë së Jashtme të Katarit tha se bisedimet mes Iranit dhe Omanit për rihapjen e Hormuzit për një pjesë të transportit detar kanë arritur në një “fazë të avancuar”.
SHBA-ja dhe Irani nënshkruan një memorandum mirëkuptimi më 17 qershor dhe nisën negociatat drejt një marrëveshjeje përfundimtare. Megjithatë, bisedimet më vonë ngecën për shkak të mosmarrëveshjeve mbi garancitë e sigurisë dhe lirinë e lundrimit përmes Hormuzit, një prej rrugëve më strategjike në botë për furnizimet globale me energji dhe tregtinë.
Nga 8 deri më 24 korrik, SHBA-ja dhe Irani shkëmbyen sulme ushtarake, ku Washingtoni ndërmori sulme ndaj objektivave brenda Iranit, ndërsa Teherani iu përgjigj duke goditur ato që i përshkroi si objekte dhe pajisje ushtarake amerikane në disa vende arabe, përfshirë Jordaninë, Bahreinin dhe Kuvajtin.
