Forca Ajrore e Shteteve të Bashkuara të Amerikës do të vendosin prani të përhershme të dronëve në Gadishullin Korean, duke ringjallur një ekip të epokës së Luftës së Dytë Botërore.
Skuadroni 431 i Zbulimit të Përkohshëm u aktivizua të hënën në Bazën Ajrore Kunsan në bregun perëndimor të Koresë së Jugut, në jug të kryeqytetit Seul. Nga kjo bazë do të operojnë dronët MQ-9 Reaper, raporton CNN.
Sipas këtij mediumi, kjo është një tjetër lëvizje për të forcuar aftësitë ajrore të ushtrisë amerikane në gadishull, pasi muajt e fundit ka ripozicionuar avionët luftarakë F-16 më afër Koresë së Veriut. Po ashtu, kjo vjen vetëm pak javë pasi udhëheqësi i Koresë së Veriut, Kim Jong Un, qëndroi përkrah liderit kinez Xi Jinping në një paradë ushtarake gjigante në Pekin.
Reaper-at janë dronë pa pilot me një motor të vetëm turboprop, të aftë për të kryer një sërë misionesh luftarake dhe të tjera, sipas një fletë-informacioni të Forcave Ajrore.
Me një rreze veprimi prej më shumë se 2,575 kilometra dhe mundësinë për të qëndruar në ajër pafundësisht përmes furnizimit ajror me karburant, Reaper-at do t’i japin një shtysë të konsiderueshme forcave amerikane në rajon.
Rrezja e tyre mbulon jo vetëm Korenë e Veriut, zona e demilitarizuar ndodhet rreth 240 km në veri të Kunsan, por edhe Detin e Kinës Lindore dhe Tajvanin, që janë rreth 1,300 km larg.
Kontinenti kinez ndodhet vetëm rreth 400 km nga Kunsan, ndërsa Deti Bohai, ku marina kineze zhvillon shpesh stërvitje, ndodhet rreth 960 km larg bazës ajrore amerikane.
“Operacionet e MQ-9 do të mbështesin prioritetet SHBA-Kore në fushat e inteligjencës, vëzhgimit dhe zbulimit në gjithë teatrin Indo-Paqësor”, thuhet në një deklaratë të Forcave Ajrore. Ky rajon ushtarak shtrihet nga ujërat në perëndim të SHBA-së deri në kufirin perëndimor të Indisë dhe nga Antarktida deri në Polin e Veriut.
“Vendosja e MQ-9 sjell një aftësi të fuqishme në rajon”, tha nënkoloneli Douglas Slater, i cili do të komandojë skuadronin.
“Ne jemi këtu për të mbështetur misionin, për të thelluar bashkëpunimin dhe për të demonstruar përkushtimin tonë të përbashkët për të ruajtur sigurinë dhe stabilitetin në Indo-Paqësor”, shtoi Slater.
Për misione luftarake, MQ-9 mund të mbajë një gamë të gjerë armësh, nga raketat Hellfire deri te bombat e drejtuara me lazer.
Vendosja e përhershme e Reaper-ëve në Kunsan tregon përkushtimin e Uashingtonit ndaj Koresë së Jugut dhe aleatëve të tjerë në Paqësor, në një kohë kur disa kanë shprehur dyshime për këtë, ndërsa administrata Trump përqendrohet më shumë në sfida të sigurisë më afër shtëpisë.
Nuk është bërë e ditur se sa dronë Reaper do të stacionohen në Kunsan, por sipas një fletë-informacioni të Forcave Ajrore, Komanda për Operacione Speciale e SHBA-së ka në inventar 50 të tillë që nga janari.
Skuadroni i 431-të ishte për herë të fundit aktiv si një njësi testuese për avionët F-111 në Kaliforni, përpara se të mbyllej në vitin 1992. Aktivizimi i skuadronit në Korenë e Jugut është lëvizja e dytë më e madhe e këtij viti nga Forcat Ajrore të SHBA-së në gadishull, shkruan CNN.
