Ministri gjerman i Mbrojtjes, Boris Pistorius, ka kritikuar komentet e fundit të presidentit francez ndaj SHBA-së dhe paralajmërimin e tij se Evropa nuk duhet të jetë një “vasal”, transmeton Kosova Post.
Në një intervistë ekskluzive me transmetuesin gjerman ‘ZDF’, Pistorius kërkoi bashkëpunim më të ngushtë midis aleatëve evropianë dhe SHBA-së për çështjet e sigurisë ndërkombëtare, si dhe paralajmëroi kundër deklaratave që mund të dëmtojnë unitetin.
“E shoh këtë deklaratë si të pavend, por mendoj se Pallati Elysee e ka korrigjuar deri diku. Nuk kemi qenë kurrë në rrezik të bëhemi apo të jemi vasal të SHBA-së”, tha Pistorius.
Pistorius theksoi se Bashkimi Evropian (BE) duhet të luajë një rol më aktiv në çështjet ndërkombëtare dhe të përcaktojë pozicionet e veta, gjithashtu në konsultim me aleatin e tij transatlantik, SHBA-në.
Ai po ashtu theksoi se ndarjet midis partnerëve transatlantik “vetëm do të ndihmonin politikën e jashtme kineze”.
Më herët, Emmanuel Macron tha se BE-ja duhet të veprojë në përputhje me “autonominë e saj strategjike” dhe të shmangë përfshirjen në çdo konflikt midis SHBA-së dhe Kinës mbi Tajvanin.
“Të jesh aleat nuk do të thotë të jesh vasal. Nuk do të thotë se nuk kemi të drejtë të mendojmë për veten tonë”, tha ai./aa
