Pas vendimit të Zyrës së Rregullatorit për Energji për liberalizimin e tregut të energjisë elektrike, nga data 1 qershor një numër i konsiderueshëm i konsumatorëve komercialë kanë kaluar nga furnizimi me tarifa të rregulluara në tregun e hapur – duke u bërë kështu konsumatorë të derregulluar.
Për të ofruar mbështetje dhe orientim për këtë kategori të re të konsumatorëve, KESCO ka vendosur që këto shërbimet të ofrohen në qendrën KESCO Premium, e cila ndodhet në Rrugën Fehmi Agani në Prishtinë (te “Kafet e Vogla”).
KESCO Premium ka funksionuar prej vitesh si qendër për konsumatorët, ndërsa rishtas aty është vendosur edhe zyra për shërbimin e bizneseve që operojnë në tregun e lirë të energjisë, të cilat duan të zgjedhin KESCO si furnizuesin e tyre.
Të gjithë konsumatorët komercialë që janë aktualisht në tregun e hapur, ose që pritet të kalojnë, janë të mirëseardhur të vizitojnë këtë zyrë për të marrë informacione të detajuara, këshillim profesional dhe për të realizuar procesin e lidhjes së kontratës për furnizim me energji nga KESCO.
KESCO, si furnizuesi me përvojën më të gjatë në treg dhe me një ekip të përkushtuar, mbetet partneri i besuar i mijëra bizneseve në Kosovë.
