Ish-zëvendësministri i Brendshëm, Selam Shkodra, ka thënë se vendimi për qarkullimin e dinarit serb në Kosovë, ka krijuar një efekt në favor të Kosovës.
Ai duke folur për situatën aktuale ku në Bruksel po diskutohet për gjetjen e një zgjidhje për zbatimin e këtij vendimi, ka thënë se para tre muajve askush nuk është ulë me diskut për këtë çështje.
Shkodra në emisionin “Këndi i Debatit” në Tëvë 1, ka thënë se dinari ka qenë pjesë e sovranitetit të Serbisë në Kosovë.
“Vendimi për dinarin ka qenë i drejtë dhe ka prodhua një efekt në favorin e Kosovës. Vetëm para tre muajve nuk është ulë askush me diskutua. Në një farë mënyre ka qenë pjesë e sovranitetit të Serbisë dinari këtu. Tre muaj para kësaj dite kur është marrë vendimi për dinarin s;ka qenë fare pjesë e diskutimit se a duhet të ndalohet ajo. Tre muaj pas po bëhet pjesë e diskutimeve dhe Kosova është pjesë e vendimmarrjes në këtë rast”, ka thënë Shkodra.
Të enjten ka përfunduar pa marrëveshje edhe takimi i tretë trepalësh në Bruksel.
Zëvendëskryeministri i Kosovës, Besnik Bislimi pas takimit ka thënë Kosova ka pranuar propozimin e emisarit Lajçak, por që Serbia ka kërkuar kohë.
Rregulloren e re të BQK-së e cila ndalon qarkullimin e dinarit dhe e valutave të tjera përpos euros në Kosovë, e kanë kundërshtuar BE dhe ShBA, të cilët kanë kërkuar shtyrje të këtij vendimi që ka hy në fuqi nga janari i këtij viti.
