Kosova e mbylli pjesëmarrjen në “Taranto 2026” me nëntë medalje, prej tyre dy të arta, tri të argjendta dhe katër të bronzta.
Në ceremoninë mbyllëse, flamurin e Kosovës e bartën karateisti Islam Selmani, fitues i medaljes së artë, dhe karateistja Fortesa Orana.
Dy medaljet e arta për Kosovën i fituan Islam Selmani në karate dhe boksierja Donjeta Sadiku.
Në podium u ngjitën edhe xhudistja Laura Fazliu dhe peshëngritësi Kianoush Rostami, i cili fitoi dy medalje të argjendta për Kosovën.
Ndërkohë, medaljet e bronzta u fituan nga xhudistët Akil Gjakova, Shpati Zekaj, Fatjona Kasapi dhe Flaka Loxha.
Me nëntë sportistë që u ngjitën në podium, Kosova regjistroi numrin më të madh të medalistëve në një edicion të Lojërave Mesdhetare.
Në renditjen e përgjithshme, Kosova u pozicionua në vendin e 15-të nga 25 shtetet që fituan medalje.
Në krye të tabelës përfundoi Italia, nikoqirja e kësaj gare, me gjithsej 223 medalje, prej të cilave 73 të arta, 78 të argjendta dhe 72 të bronzta.
Një tjetër moment i rëndësishëm i ceremonisë mbyllëse ishte dorëzimi i flamurit të Lojërave Mesdhetare te kryetari i Komunës së Prishtinës, Përparim Rama.
