Një valë dhune ka shpërthyer në Meksikë, pasi lideri më i kërkuar i drogës atje u vra në një operacion për arrestimin e tij.
Nemesio Oseguera Cervantes, i njohur si “El Mencho”, ishte udhëheqësi i kartelit të frikshëm të drogës Jalisco New Generation (CJNG), i cili vdiq pasi u plagos rëndë në përleshjet midis mbështetësve të tij dhe ushtrisë të dielën.
Katër anëtarë të CJNG u vranë gjatë operacionit në qytetin Tapalpa, në shtetin qendror-perëndimor të Jaliscos, dhe tre ushtarakë u plagosën gjithashtu, tha ministria meksikane e mbrojtjes.
Hakmarrja për vdekjen e bosit të drogës ka nxitur që dhuna të përhapet në të paktën një duzinë shtetesh, me CJNG që bllokon rrugët me automjete që digjen.
Gjatë gjithë të dielës ka pasur raportime për persona të armatosur në disa pjesë, raporton BBC, transmeton Klankosova.tv
Guvernatori i Jaliscos, Pablo Lemus Navarro, shpalli kodin e kuq në shtet, duke ndaluar të gjithë transportin publik dhe duke anuluar ngjarjet masive dhe mësimet me pjesëmarrje fizike.
Turistët që folën me agjencinë e lajmeve Reuters e përshkruan qytetin turistik të Puerto Vallarta si një “zonë lufte”.
Rreth 250 postblloqe rrugore ishin vendosur në të gjithë vendin gjatë trazirave, me 65 në Jalisco, raportoi partneri amerikan i lajmeve i BBC-së, CBS. Në përditësimin e tij të fundit, kabineti meksikan i sigurisë tha se katër postblloqe mbetën aktive në Jalisco.
Kabineti thotë se 25 persona janë arrestuar, 11 për pjesëmarrje të dyshuar në akte të dhunshme dhe 14 të tjerë për plaçkitje dhe grabitje të dyshuara.
Dyqanet ishin në flakë dhe rreth 20 degë bankash u sulmuan gjatë dhunës, shtoi ajo.
ShBA-ja i ka paralajmëruar qytetarët e tyre të qëndrojnë të strehuar në pesë shtete: Jalisco, Tamaulipas, zonat e Michoacán, Guerrero dhe Nuevo Leon.
Sekretarja e Shtypit e SHBA-së, Karoline Leavitt, tha vonë të dielën në mbrëmje se El Mencho ishte një “objektiv kryesor për qeverinë meksikane dhe të Shteteve të Bashkuara si një nga trafikantët kryesorë”.
